साईमत, पाचोरा : प्रतिनिधी
शहरातील भडगाव रस्त्यावरील रेल्वे उड्डाणपुलावर कार आणि दुचाकी यांच्यात झालेल्या भीषण अपघातात श्रीकृष्ण नगरातील दुचाकीस्वार जागीच ठार झाल्याची घटना रात्री साडेदहा वाजेच्या सुमारास घडली. याप्रकरणी पाचोरा पोलीस ठाण्यात गुन्हा दाखल केला आहे. भूषण संतोष हटकर (वय २०, रा. श्रीकृष्ण नगर, पाचोरा) असे मृत तरूणाचे नाव आहे.
सविस्तर असे की, जळगाव चौफुलीजवळील श्रीकृष्ण नगर परिसरातील रहिवासी भूषण संतोष हटकर (वय २०) आणि प्रवीण नाना हटकर (वय २२) हे दोघे मित्र दुचाकीवरुन (क्रमांक एमएच १९ ई डी २१९६) मंगळवारी रात्री साडेदहा वाजता घरी जात होते. दरम्यान जारगाव चौफुलीकडून (क्र.एमएच १५ बीएन १०३५) मधील दोघेजण भडगाव रस्त्याकडे जात असतांना दोन्ही वाहने एकमेकांवर आदळले. त्यात दुचाकीस्वार भूषण संतोष हटकर हा जागेवर ठार झाला तर त्याच्या मागे बसलेला प्रवीण नाना हटकर याचे दोन्ही पाय फ्रॅक्चर झाले. चारचाकी वाहनातील देशमुखवाडी परिसरातील दोघे जण गंभीर जखमी झाले. जखमींवर खासगी रुग्णालयात उपचार सुरू आहेत. त्यातील मयत भूषण संतोष हटकर हा खासगी व्यक्तीकडे सेंडीग कामावर मजूरी करत होता. त्याच्या पश्चात आई, वडील, एक भाऊ असा परिवार आहे. तर जखमी प्रवीण नाना हटकर हा आई-वडिलास एकुलता एक मुलगा आहे. तो बाजार समितीत हमाली काम करतो. मयताचे शवविच्छेदन ग्रामीण रुग्णालयाचे वैद्यकीय अधीक्षक डॉ. अमित साळुंखे यांनी केले. याप्रकरणी पाचोरा पोलीस ठाण्यात गुन्हा दाखल केला आहे.
