साईमत, जळगाव : प्रतिनिधी
येवला येथे विभागीय कुस्ती स्पर्धा शनिवारी, २३ सप्टेंबरला पार पडली. स्पर्धेत प्रगती विद्या मंदिर शाळेचा विद्यार्थी व शाहुनगरमधील हनुमान आखाडा व्यायामशाळेचा पहेलवान हर्षित मनिष झेंडे हा ७१ किलो वजनी गटात व ‘ग्रीको रोमन’ कुस्ती प्रकारात प्रथम क्रमांकाने विजयी झाला. स्पर्धेच्या गटात प्रत्येकी दोन राऊंड झाले. दोन्ही राऊंडमध्ये हर्षित झेंडेने जिंकून अंतिम फेरीत विजय मिळविला. आता त्याची २४ ते २७ दरम्यान कोल्हापूर येथे आयोजित राज्यस्तरीय शालेय कुस्ती क्रीडा स्पर्धा २०२३-२४ स्पर्धेसाठी निवड झाली आहे. तो त्या स्पर्धेसाठी कोल्हापूर येथे रवाना झाला आहे.
हर्षित हा जैन इरिगेशन सिस्टीम्स लि. कंपनीच्या एक्सपोर्ट मार्केटिंग विभागाचे सहकारी मनिष झेंडे यांचा चिरंजीव आहे. यशस्वी कामगिरीसाठी त्याला गुरु वस्ताद विजय वाडकर, शाळेतील शिक्षकांचे मार्गदर्शन मिळाले. या यशाबद्दल हर्षितचे कुटूंबिय, हनुमान आखाड्याचे विजय वाडकर, समस्त पैलवान मित्रमंडळीतर्फे, शाळेतील समस्त शिक्षकांतर्फे कौतुक केले आहे.
