मुख्यमंत्री होण्यासाठी शरद पवार यांच्या खासदार कन्या सुप्रिया सुळे पुजाअर्चा व अभिषेक करत आहेत. नातू आ. रोहित पवार हे देखील मोठ-मोठ्या लोकांवर वक्तव्य करुन पुढे येत आहेत. तर पवारांचे पुतणे लाडके उपमुख्यमंत्री अजित पवार हे देखील मुख्यमंत्री होण्याच्या स्पर्धेत आहेत. त्यामुळे, सुप्रिया, अजित की रोहित… यापैकी पवारांमधला मुख्यमंत्री पदाचा नेमका उमेदवार कोण? हे पवारांनी घरच्या घरी ठरवून घ्यावे, असा टोला भाजप नेते प्रविण दरेकरांनी पवार कुटुंबीयांना लगावला आहे. ते पुण्यातील पत्रकार परिषदेत बोलत होते.
रोहित पवारांना दरेकरांचा खोचक सल्ला
आ. रोहित पवारांनी नुकतीच आमदार बनून राजकारणाची इनिंग सुरु केली आहे. आपली उंची काय आपण बोलतोय काय याच भान रोहित पवारांनी ठेवाव. अजित पवार नेहमी सांगतात वाद-विवाद करु नका त्यापेक्षा लोकांचे कामं करा. त्यामुळे तुम्ही देखील तसे काही करु नका. गोपीनाथ मुंडे आता हयात नाही. त्यांच्या संदर्भात वक्तव्य करुन वाद निर्माण करण्याचा प्रयत्न करु नका. तुम्ही तुमच्या घरातली काळजी घ्या, असा खोचक सल्लाही प्रविण दरेकरांनी रोहित पवारांना दिला. रोहित पवारांनी गोपीनाथ मुंडे यांच्यावर खोचक वक्तव्य केले होते. त्यावर प्रवीण दरेकर बोलत होते.
राऊतांनी तोंड सांभांळून नीट बोलावे
एक आमदार किमान तीन लाख लोकांचे प्रतिनिधित्व करतात. आमदारांना घोड़ेबाजारात उभं करणे हा आमदारांचा अपमान आहे. आमदार काही बाजारातली विकाऊ वस्तु नाही. आमदारांचा स्वाभिमान दुखावला तर संजय राऊत यांच्या ऐवजी संजय पवार यांना आमदार निवडून देतील. त्यामुळे संजय राऊतांनी तोंड सांभांळून नीट बोलावे. ते त्यांच्या फायद्याचे राहील, असेही दरेकर पत्रकार परिषदेत म्हणाले.
चुकतो त्यालाच ईडीची भीती
ईडी-ईडी म्हणताना तुम्ही धुतल्या तांदळाचे आहात का? क्राईम ब्रांच,अॅन्टी करप्शन यांना तुम्ही कुलूप लावून ठेवल काय ? ईडी सारख्या कोणत्याही यंत्रणांना आम्ही दोष देत नाही. ज्यांचे कृत्य ईडी चौकशी होण्यासारख असेल तर त्यांना भीती वाटणं साहजिक आहे. ईडीची भीती सर्वसामान्य आमदारांना वाटत नाही. हे आमदारांना योग्य पद्धतीने कळते. तुमचा आत्मविश्वास हरवला असेल तर दुसऱ्याला दोष देण्यात अर्थ नाही, असा टोला त्यांनी संजय राऊतांना लगावला.
