पोलीस कारवाई; २७ हजार रुपयांचा कट्टा जप्त
साईमत/भुसावळ/ प्रतिनिधी
वरणगाव पोलीस ठाण्याच्या हद्दीत पोलिसांनी गावठी पिस्तूलसह एका संशयित आरोपीला ताब्यात घेतले असून, एकूण २७ हजार रुपयांवर मूल्य असलेली शस्त्रसामग्री जप्त करण्यात आली आहे.
भुसावळ बाजारपेठ पोलीस ठाण्याचे वरिष्ठ पोलीस निरीक्षक राहुल गायकवाड यांच्या आदेशानुसार, पोलीस उपनिरीक्षक सोपान गोरे यांच्या नेतृत्वाखालील पथकाने संजय गोपाल चंदेले (वय ५०, रा. ऑर्डनन्स फॅक्टरी परिसर, वरणगाव) याला ताब्यात घेतले. त्याच्याकडून एक सिल्वर रंगाची गावठी पिस्तूल (कट्टा) तसेच दोन पितळी राऊंड जप्त करण्यात आले.
या कारवाईनंतर आरोपीविरुद्ध भारतीय शस्त्र अधिनियम कलम ३/२५ अन्वये गुन्हा दाखल केला गेला असून, पुढील चौकशी सुरू आहे. आरोपीस मुद्देमालासह वरणगाव पोलीस ठाण्याच्या ताब्यात ठेवण्यात आले आहे.
या कारवाईत पोलीस कर्मचारी प्रेमचंद सपकाळे, सलीम तडवी, उमाकांत पाटील, श्रीकृष्ण देशमुख, रविंद्र चौधरी, छगन तायडे आणि रतन गिते यांनी सक्रिय सहभाग घेतला.
पोलीस प्रशासनाने नागरिकांना माहिती देत सांगितले की, या कारवाईमुळे परिसरात सुरक्षिततेची भावना वाढली असून, कोणतीही संशयास्पद हालचाल किंवा शस्त्रसंबंधी माहिती आढळल्यास त्वरित पोलीसांना कळवावी.
या कारवाईमुळे वरणगाव परिसरात शस्त्रसुरक्षा आणि नागरिकांची सुरक्षितता यावर पोलिसांचे काटेकोर लक्ष असलेले दिसून येत आहे.
