277 कोटी रुपयांच्या निधीस मंजुरी; ई-केवायसी दुरुस्ती ३१ मार्चपर्यंत करण्याची अंतिम मुदत
साईमत / जळगांव / प्रतिनिधी
मुख्यमंत्री माझी लाडकी बहीण योजनेत फेब्रुवारी महिन्याचा १५०० रुपयांचा हप्ता अद्यापही लाभार्थी महिलांच्या खात्यात जमा झाला नाही. त्यामुळे या योजनेतील लाभार्थी महिलांमध्ये संभ्रमाची स्थिती निर्माण झाली आहे. राज्य सरकारने योजनेच्या फेब्रुवारी हप्त्याच्या वितरणासाठी मोठा निर्णय घेतला असून, नवीन अपडेट समोर आला आहे.
निधी मंजुरी आणि हप्त्याचे वितरण : सामाजिक न्याय विभागाने फेब्रुवारी महिन्याच्या हप्त्यासाठी २७७ कोटी रुपयांच्या निधीस मंजुरी दिली असून, ही रक्कम महिला व बालविकास विभागाच्या निधी वितरण प्रणालीवर वर्ग करण्यात आली आहे. त्यामुळे लाभार्थी महिलांच्या खात्यात लवकरच १५०० रुपयांचा हप्ता जमा होण्याची शक्यता आहे. जानेवारी महिन्याचा हप्ता २३ फेब्रुवारीला वितरित करण्यात आला होता. आता फेब्रुवारीचा हप्ता लवकरच देण्यात येणार असल्याची माहिती मिळाली आहे.
ई-केवायसी दुरुस्तीची अंतिम मुदत : ई-केवायसी करताना काही महिलांनी चुकीचे पर्याय निवडल्याचे समोर आले. अशा महिलांना दुरुस्ती करण्यासाठी ३१ मार्च २०२६ पर्यंत मुदत देण्यात आली आहे. आता फक्त ६ दिवस शिल्लक आहेत. ज्यांनी अद्याप दुरुस्ती केली नाही, त्यांनी तातडीने मोबाईल किंवा कॉम्प्युटरवरून दुरुस्ती पूर्ण करावी, अन्यथा योजनेचा लाभ बंद होऊ शकतो.
ई-केवायसी प्रक्रिया पूर्ण न केल्यामुळे अनेक लाभार्थींच्या संख्येत घट झालेली आहे. यामुळे ज्या महिलांनी अद्याप दुरुस्ती केलेली नाही, त्यांनी निश्चितपणे ३१ मार्चपर्यंत ती पूर्ण करून फेब्रुवारीचा हप्ता आणि पुढील सर्व हप्ते नियमित मिळवावे, असे प्रशासनाने सुचवले आहे.
