एमआयडीसी पोलीस ठाण्यात अकस्मात मृत्यूची नोंद
साईमत/जळगाव/प्रतिनिधी :
शहरातील लक्ष्मी नगरातील एका ४५ वर्षीय व्यक्ती अपघातात गंभीर जखमी झाला होता. त्यानंतर त्यांच्यावर खासगी रूग्णालयात उपचार सुरू असतांना सोमवारी, १२ मे रोजी पहाटेच्या सुमारास त्यांचा मृत्यू झाला. याप्रकरणी एमआयडीसी पोलीस ठाण्यात अकस्मात मृत्यूची नोंद केली आहे. शिवाजी लोभाजी तडवी (वय ४५ रा. लक्ष्मी नगर, जळगाव असे मयत झालेल्या व्यक्तीचे नाव आहे.
जळगाव शहरातील लक्ष्मी नगर परिसरात शिवाजी तडवी हे आपल्या कुटुंबासह वास्तव्याला होते. ते ११ मे रोजी सकाळी ९ वाजेच्या सुमारास अपघातात गंभीर जखमी झाले होते. त्यानंतर त्यांना तातडीने जिल्हा शासकीय वैद्यकीय महाविद्यालयात उपचारार्थ दाखल केले होते. त्यांच्यावर उपचार सुरू असतांना १२ मे रोजी पहाटे मृत्यू झाला. तपास पो.हे.कॉ. गफ्फुर तडवी करीत आहे.
मयतात शिरसोलीतील तरुणाचा समावेश
जळगाव शहरातील शिरसोली रस्त्यावरील इकरा युनानी कॉलेजजवळ दुचाकीवरून पडून गंभीर जखमी झालेल्या ३५ वर्षीय तरुणाचा उपचारादरम्यान मृत्यू झाला. विनोद गोविंदा हटकर (रा. ओम नगर, शिरसोली, जळगाव) असे मृत तरुणाचे नाव आहे. याप्रकरणी १२ मे रोजी एमआयडीसी पोलीस ठाण्यात अकस्मात मृत्यूची नोंद केली आहे.
शिरसोली येथे विनोद हटकर हा आपल्या कुटुंबासोबत राहत होता. २ मे रोजी जळगावकडून शिरसोलीकडे येत असतांना इकरा युनानी कॉलेजजवळ त्याची दुचाकी स्लिप झाली आणि तो खाली पडला. अपघातात त्याच्या डोक्याला गंभीर दुखापत झाली होती. त्याला तातडीने एका खासगी रुग्णालयात दाखल केले होते. परंतु उपचारावेळी त्याची प्राणज्योत मालवली. तपास पो.कॉ. समाधान टहाकळे करीत आहे.
