अपघातात तरुणीच्या दोन्ही पायांचा चेंदामेंदा; तरुणही गंभीर जखमी
साईमत/जळगाव/प्रतिनिधी
शहरातील आकाशवाणी चौकात ट्रकने दिलेल्या धडकेत दुचाकीवर मागे बसलेल्या तरुणीच्या दोन्ही पायांचा चेंदामेंदा झाला असून दुचाकीस्वार गंभीर जखमी झाल्याची घटना महाराष्ट्र दिनी गुरुवारी, १ मे रोजी रात्री आठ वाजता घडली होती. दरम्यान, दोन्ही जखमींवर शासकीय वैद्यकीय महाविद्यालयात उपचार सुरू असल्याचे सांगण्यात आले.
शहरातील आकाशवाणी चौकात ट्रकच्या धडकेत जखमी झालेल्या दोन जणांमध्ये नयन मिलिंद तायडे (वय २२, रा.महाबळ) आणि रोहित संजय माळी (वय २१, रा. राधाकृष्ण नगर, जळगाव) यांचा समावेश आहे.
जळगाव शहरातील आकाशवाणी चौकाकडून नयन तायडे आणि रोहित माळी हे दोन्ही तरुण-तरुणी दुचाकीने आकाशवाणी चौकाकडून उड्डाणपुलाकडे वळण घेत असताना मागून येणाऱ्या ट्रकने त्यांना जोरदार धडक दिली. या धडकेत तरुणी रस्त्यावर पडल्याने तिच्या पायावरुन ट्रकचे दोन्ही चाक गेल्याने तिच्या दोन्ही पायांचा चेंदामेंदा झाला तर रोहित हा गंभीर जखमी झाला आहे.
दरम्यान, ही घटना घडल्यानंतर परिसरातील स्थानिक नागरिकांनी मदतीसाठी धाव घेऊन त्यांना तातडीने उचलून जिल्हा शासकीय वैद्यकीय महाविद्यालयात दाखल केले. यासंदर्भात पोलीस ठाण्यात उशिरापर्यंत कुठलेही नोंद नसल्याचे सांगण्यात आले.
