साईमत, चाळीसगाव : प्रतिनिधी
शहरातील स्टेशनरोड परिसरात स्वाती देशमुख या रिक्षाने प्रवास करीत असतांना प्रवाशी रिक्षात गर्दी करुन त्यांचे लक्ष विचलीत करुन त्यांच्या हातातील पर्स जबरदस्तीने ओढुन, जबरी चोरी करुन घेऊन जाणाऱ्या तीन महिला आरोपीतांना गस्तीवरील पोलीस अंमलदारांनी ताब्यात घेतले आहे. त्यांना महिला पोलीस अंमलदार व महिला पंचासमक्ष ताब्यात घेऊन गुन्ह्यातील मुद्देमाल चार हजार रुपये रोख, पंचवीस हजाराचे सोन्याचे दागिने हस्तगत केले आहेत.
याप्रकरणी पोलीस अधीक्षक डॉ.महेश्‍वर रेड्डी, अपर पोलीस अधीक्षक श्रीमती कविता नेरकर (पवार), सहायक पोलीस अधीक्षक अभयसिंह देशमुख यांचे मार्गदर्शन आणि सुचनेप्रमाणे चाळीसगाव शहर पो.स्टे.ला फिर्यादीच्या तक्रारीवरुन गुन्हा दाखल केला आहे.
याकामी सहायक पोलीस निरीक्षक सागर ढिकले, पोलीस उपनिरीक्षक सुभाष पाटील, सुहास आव्हाड व पोलीस अंमलदार राहुल सोनवणे, पवन पाटील, मनोज चव्हाण, आशुतोष सोनवणे, रवींद्र बच्छे, महेंद्र पाटील, भूषण पाटील, विजय पाटील, राकेश महाजन, ज्ञानेश्‍वर पाटोळे यांनी कारवाई केली आहे. पुढील तपास पोलीस उपनिरीक्षक सुभाष पाटील, राहुल सोनवणे, ज्ञानेश्‍वर पाटोळे करीत आहेत.
