साईमत, जळगाव : प्रतिनिधी
पिंप्राळा येथील कोळीवाडा जवळील वटुकेश्‍वर महादेव मंदिरातील नागदेवता व त्रिशूल चोरी झाल्याची घटना गुरुवारी, ६ जून रोजी सकाळी १०.३० वाजता घडली. याप्रकरणी रामानंद नगर पोलिसात लेखीनोंद केली आहे.
मंदिरात चोर आहे की, भाविक हे लक्षात येत नसल्याने चोरांनी त्याचा फायदा घेत सकाळीच मंदिरातील पाच किलोचा पितळी नागदेवता व दोन किलोचा पितळी त्रिशुल चोरून नेला.
याबाबत परिसरातील ग्रामस्थांनी रामानंद नगर पोलिसात लेखी सह्यासहीत तक्रार केली आहे. यावेळी रामानंद नगर पोलीस स्टेशनचे पोलीस कर्मचाऱ्यांनी घटनास्थळी दाखल होऊन पाहणी केली.
गेल्या महिन्याभरापासून सोनी नगर जवळील श्रीराम नगरातील हनुमान मंदिरातील हनुमान मुर्तीला चांदीचे दोन डोळे लावले होते. ते चोरी झाल्याची घटना घडली होती. तसेच सोनी नगरातील अनेकांच्या लहान सायकली चोरी झाल्या आहेत. रात्रीच्या वेळी भुरट्या चोरांची मुजोरी वाढल्यामुळे सोनी नगर, पिंप्राळा परिसरात पोलिसांनी रात्रीच्या वेळी गस्त घालण्यात यावी, अशी मागणी परिसरातील नागरिकांनी केली आहे.
