मुंबई ः प्रतिनिधी
शिवसेनेत फूट पडल्यानंतर ठाकरे गटाला गळती लागली आहे. अनेक नेते, पदाधिकारी आणि कार्यकर्त्यांनी शिंदे गटात प्रवेश केला आहे.यानंतर आता उद्धव ठाकरे यांनी पुन्हा एकदा पक्षबांधणीला सुरुवात केली आहे. याच पार्श्वभूमीवर शिवसेनेचे माजी खासदार भाऊसाहेब वाकचौरे पुन्हा ठाकरे गटात परतणार आहेत.पहिल्यांदाच निवडणूक लढवणाऱ्या भाऊसाहेब वाकचौरे यांनी २००९ च्या लोकसभा निवडणुकीत रामदास आठवले यांना पराभूत केले होते.
२०१४ च्या निवडणुकीत भाऊसाहेब वाकचौरे यांनी शिवसेनेला रामराम ठोकून काँग्रेसमध्ये प्रवेश केला मात्र २०१४ साली त्यांना पराभवाचा सामना करावा लागला. त्यानंतर वाकचौरे भाजपात गेले आणि श्रीरामपूर विधानसभा मतदारसंघातून विधानसभेची निवडणूक लढवली मात्र तिथेही त्यांना अपयश आले. यानंतर आता ते पुन्हा ठाकरे गटात परतणार आहेत. उद्धव ठाकरे यांचे निवासस्थान ‘मातोश्री’वर त्यांचा पक्षप्रवेश पार पडणार आहेत.
एका मराठी वृत्तवाहिनीशी संवाद साधताना भाऊसाहेब वाकचौरे म्हणाले, “आज मी स्वगृही परतत आहे. २००९ च्या निवडणुकीमध्ये उद्धव ठाकरे आणि शिवसेनेच्या कार्यकर्त्यांनी मला खासदार केलं होतं. २०१४ ला जे घडलं किंवा घडवलं गेलं, त्याची मी पुन्हा चर्चा करू इच्छित नाही. परंतु एकच सांगू इच्छितो की, ‘सुबह का भुला शाम को घर आ जायें, तो उसे भुला नहीं कहते’, या उक्तीप्रमाणे मी स्वगृही परतत आहे. आज उद्धव ठाकरे यांच्या हस्ते मी शिवबंधन बांधून घेत आहे.”
लोकसभा निवडणुका सहा महिन्यावर येऊन ठेपल्या असून शिवसेना शिंदे गटासह भाजपाला शह देण्यासाठी शिवसेना ठाकरे गटाचे प्रमुख उध्दव ठाकरे यांनी संपूर्ण राज्यात उमेदवारांची चाचपणी सुरू केली आहे.
