शहर पोलीस गुन्हे शोध पथकाकडून चोरीच्या गुन्ह्यांची उकल
साईमत/जळगाव/प्रतिनिधी :
शहर पोलीस गुन्हे शोध पथकाने मोठी कारवाई करत दोन अट्टल दुचाकी चोरट्यांना अटक केली आहे. अशा कारवाईमुळे केवळ जळगाव शहरातीलच नव्हे तर धुळे जिल्ह्यातील साक्री पोलीस स्टेशन हद्दीतील दोन दुचाकी चोरीच्या गुन्ह्यांची उकल झाली आहे. दरम्यान, आरोपींकडून दोन चोरीच्या दुचाकीही जप्त केल्या आहेत.
सविस्तर असे की, जळगाव शहरातील शिवाजी नगरातील हमाल वाड्यातील रहिवासी उदयकुमार सुभाष कोचुरे यांची गेल्या २४ ऑगस्ट रोजी रात्री ३० हजार रुपये किमतीची होंडा ॲक्टिव्हा मोपेड चोरीला गेली होती. याप्रकरणी शहर पोलीस स्टेशनमध्ये गुन्हा दाखल केला होता. गुन्ह्याचा तपास करण्यासाठी पोलीस निरीक्षक सागर शिंपी यांनी दोन पथके तयार केली होती. पथकांनी मिळालेल्या गोपनिय माहितीनुसार, तात्काळ कारवाई करत ‘इरफान’ खान उस्मान खान पठाण (वय २१, रा. साक्री, जि. धुळे, ह.मु. जळगाव) याला ताब्यात घेतले आहे.
गुन्ह्याची आरोपींकडून कबुली
इरफानची कसून चौकशी केल्यावर ही चोरी त्याने आपला मित्र अदिल शेख उर्फ ‘नाट्या’ माजिद शेख (वय १९, रा. गेंदालाल मिल, जळगाव) याच्या मदतीने केल्याची कबुली दिली. पोलिसांनी दोघांनाही अटक करून चोरीची मोपेड जप्त केली. पोलीस कोठडीत असताना इरफानची अधिक चौकशी केल्यावर त्याने आणखी एका गुन्ह्याची कबुली दिली. नोव्हेंबर २०२४ मध्ये त्याने साक्री पोलीस स्टेशन हद्दीतून एक हिरो होंडा कंपनीची फॅशन प्रो मोटारसायकल चोरी केली होती. याप्रकरणी साक्री पोलीस स्टेशनमध्येही चोरीचा गुन्हा दाखल आहे. ती मोटारसायकलही पोलिसांनी जप्त केली आहे.
यांचा होता पथकात समावेश
ही उल्लेखनीय कामगिरी पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे आणि पोलीस निरीक्षक सागर शिंपी यांच्या मार्गदर्शनाखाली करण्यात आली. कारवाई केलेल्या पथकात गुन्हे शोध पथकातील सहायक फौजदार सुनील पाटील, पोलीस हवालदार उमेश भांडारकर, सतीश पाटील, योगेश पाटील, नंदलाल पाटील, विरेंद्र शिंदे, दीपक शिरसाठ, भगवान पाटील, पोलीस नाईक सुधीर साळवे, पोलीस कॉन्स्टेबल अमोल ठाकूर, भगवान मोरे, प्रणय पवार, राहुलकुमार पांचाळ यांचा समावेश होता.
