मेहरूण भागातील घटना, रुग्णालयात आईचा हेलावणारा आक्रोश
साईमत/जळगाव/प्रतिनिधी :
शहरातील मेहरूण भागातील ममता हॉस्पिटलजवळ खेळत असलेल्या ६ वर्षीय चिमुकलीला अज्ञात रिक्षा चालकाने भरधाव वेगाने वाहन चालवत जबर धडक दिली. धडकेत चिमुकलीचा जागीच मृत्यू झाल्याची धक्कादायक घटना मंगळवारी, २६ ऑगस्ट रोजी सकाळी १२ ते १ वाजेच्या सुमारास घडली. याप्रकरणी एमआयडीसी पोलीस स्टेशनला गुन्हा दाखल झाल्याचे पोलिसांनी सांगितले. मयत चिमुकलीचे मनिषा जयसिंग बारेला (वय ६, रा. नागलवाडी, ता. चोपडा, हल्ली मु. मेहरूण, जळगाव) असे नाव आहे. या घटनेमुळे परिसरातील नागरिकांमध्ये हळहळ व्यक्त होत आहे.
सविस्तर असे की, स्थानिक ठेकेदार अहमद खान यांच्याकडे बांधकाम व्यवसायावर मनीषाची आई ही हातमजुरी करून उदरनिर्वाह करीत होती. मनिषा ही मराठी शाळेत इयत्ता पहिलीत शिक्षण घेत होती. दरम्यान, ममता हॉस्पिटलजवळ बांधकाम व्यवसायाच्या कामावर मनिषाची आई ही मंगळवारी नेहमीप्रमाणे काम करत होती. मनिषाही बाजूलाच खेळत होती. अचानक रस्त्याच्या बाजूला मनीषा गेल्यावर तेथे भरधाव रिक्षाने तिला समोरून धडक दिली. त्यात मनिषा बारेलाच्या तोंडाला, पायाला जबर मार बसला.
आक्रोश पाहून अनेकांचे डोळे पाणावले…!
यावेळी ठेकेदार अहमद खान यांनी नागरिकांच्या मदतीने चिमुकलीला शासकीय वैद्यकीय महाविद्यालय व रुग्णालयात उपचारासाठी दाखल केले होते. तेव्हा तेथील वैद्यकीय अधिकाऱ्यांनी तिला तपासून मयत घोषित केले. यावेळेला रुग्णालयात मनिषाच्या आईचा मन हेलावणारा आक्रोश पाहून अनेकांचे डोळे पाणावले. दरम्यान, मनिषाचे वडील देवसिंगही पाच वर्षांपूर्वी एका बस अपघातात मयत झाले असल्याची माहिती मिळाली. मयत मनिषाच्या पश्चात आई, मामा असा परिवार आहे.
