गळफास घेऊन संपविले जीवन
साईमत/पहुर, ता. जामनेर/प्रतिनिधी
सततची नापिकी आणि कर्जाचा वाढता बोजा यामुळे आर्थिक संकटात सापडलेल्या तरुण अल्पभूधारक शेतकऱ्याने गळफास घेऊन आत्महत्या केल्याची हृदयद्रावक घटना रविवारी, ६ रोजी रात्री साडे आठ वाजेच्या सुमारास घडली. याप्रकरणी पहुर पोलीस ठाण्यात अकस्मात मृत्यूची नोंद केली आहे.
गुणवंत उत्तम गिते (वय २९) असे मृत शेतकऱ्याचे नाव आहे. तो वडील, भाऊ यांच्यासोबत शेती करत होता. दरम्यान, जामनेर तालुक्यातील लोंढरी बुद्रुक येथील शेतकऱ्याच्या आत्महत्येनंतर दुसऱ्या घडलेेल्या घटनेमुळे सर्वत्र हळहळ व्यक्त होत आहे.
रविवारी साडे आठ वाजेच्या सुमारास त्याने जामनेर रस्त्यावरील सोनाळा शिवारातील हॉटेल मॉ कमल हॉटेलच्या पाठीमागील बाजूस एकनाथ गाडे यांच्या शेतातील निंबाच्या झाडाला गळफास लावून आत्महत्या केली. घटनेची माहिती मिळताच पोलीस उपनिरीक्षक भरत दाते आणि ईश्वर कोकणे यांनी घटनास्थळी भेट देऊन ग्रामीण रुग्णालयात आणले.
तेव्हा तेथील डॉ.संदीप पाटील यांनी तपासणीअंती गुणवंतला मृत घोषित केले. ग्रामीण रुग्णालयात त्याचे शवविच्छेदन करण्यात आले. पुढील तपास पोलीस निरीक्षक सचिन सानप यांच्या मार्गदर्शनाखाली सुरू आहे.त्याच्या पश्चात पत्नी, मुलगा असा परिवार आहे.
