साईमत, पहूर, ता. जामनेर : वार्ताहर
येथील महात्मा फुले शिक्षण संस्था संचलित सावित्रीबाई फुले माध्यमिक विद्यालयाचे क्रीडा शिक्षक तथा शौर्य स्पोर्ट्स अकॅडमीचे सचिव हरीभाऊ राऊत यांनी अमरावती येथे आयोजित द्वितीय राज्यस्तरीय खेलो मास्टर्स गेम्स स्पर्धेत १५०० मिटर्स ॲथेलेटिक्स स्पर्धेत कांस्य पदकाची कमाई केली. त्यामुळे पहूरच्या शिरपेचात मानाचा तुरा रोवला गेला आहे.
श्री शिवाजी शिक्षण संस्था अमरावती, महाराष्ट्र खेलो मास्टर्स गेम्स असोसिएशन व अमरावती जिल्हा खेलो मास्टर्स गेम्स असोसिएशन यांच्या संयुक्त विद्यमाने आयोजित द्वितीय महाराष्ट्र राज्य खेलो मास्टर्स गेम्स स्पर्धेत महात्मा फुले शिक्षण संस्था संचलित सावित्रीबाई फुले माध्यमिक विद्यालयाचे क्रीडा शिक्षक हरिभाऊ राऊत यांनी उत्स्फूर्त सहभाग नोंदविला. १५ मिटर्स धावणे, ॲथलेटिक क्रीडा प्रकारात त्यांनी कांस्यपदक पटकावले.
स्पर्धेचे उद्घाटन खासदार नवनीत राणा यांनी क्रीडा ज्योत प्रज्ज्वलित करून केले. अध्यक्षस्थानी श्री शिवाजी शिक्षण संस्थेचे अध्यक्ष तथा माजी कृषी मंत्री हर्षवर्धन देशमुख होते. प्रमुख पाहुणे म्हणून शिवाजी शिक्षण संस्थेचे कोषाध्यक्ष दिलीप इंगोले, आ.बळवंत वानखेडे, माजी महापौर विलास इंगोले, महाराष्ट्र खेलो मास्टर्स गेम्स असोसिएशनचे सचिव अमन चौधरी, पदाधिकारी सुनील हामंद, गुरुपालसिंग सेठी, राजेश जाधव, प्रशांत कोल्हे, जिल्हा क्रीडा अधिकारी गणेश जाधव यांची उपस्थिती होती. विजेते हरीभाऊ राऊत यांना मान्यवरांच्या हस्ते कांस्य पदक आणि सन्मानपत्र प्रदान करण्यात आले. यशस्वीतेसाठी अनिल पवार यांचे सहकार्य लाभले. प्रास्ताविक शिवाजी शारीरिक शिक्षण महाविद्यालयाच्या प्राचार्या अंजली ठाकरे तर सूत्रसंचालन शिवछत्रपती पुरस्कार्थी डॉ.नितीन चवाळे यांनी केले.
त्यांच्या यशाबद्दल महात्मा फुले शिक्षण संस्थेचे अध्यक्ष बाबुराव अण्णा घोंगडे, उपाध्यक्ष शांताराम दादा पाटील, सचिव भगवान आण्णा घोंगडे, सर्व संचालक मंडळ, सावित्रीबाई फुले माध्यमिक विद्यालयाच्या मुख्याध्यापिका श्रीमती व्ही. व्ही. घोंगडे यांच्यासह सर्व शिक्षक वृंद शिक्षकेत्तर कर्मचारी, विद्यार्थी आदींनी कौतुक केले.
