जळगाव तालुका पोलिसात चार महिलांविरुध्द गुन्हा दाखल
साईमत/जळगाव/प्रतिनिधी :
शहरापासून जवळील आव्हाणे शिवारातील रोहनवाडी येथे नातीला शिकवणाऱ्या शिक्षिकेचा पत्ता न दिल्याच्या कारणावरून एका महिलेसह तिच्या नातीला शिवीगाळ करत मारहाण केल्याची घटना घडली आहे. तसेच त्यांच्या गळ्यातील सोन्याची चेन तोडून नुकसान केल्याचा प्रकार २४ मे रोजी सकाळी ११ वाजता घडला. याप्रकरणी जळगाव तालुका पोलीस ठाण्यात चार महिलांविरुध्द गुन्हा दाखल केला असल्याचे सांगण्यात आले.
सविस्तर असे की, रोहनवाडी येथे राहणाऱ्या सुनंदा आनंद निकम (वय ५७) यांच्याकडे मंगल मुरलीधर सुरवाडे, अश्विनी शालिक सुरवाडे, गीता धनराज वाघ आणि सरिता संजय दांडगे (सर्व रा. महादेव नगर, जळगाव) अशा चार महिला आल्या होत्या. त्यांना सुनंदा निकम यांच्या नातीला शिकवणाऱ्या शिक्षिकेचा पत्ता हवा होता. मात्र, सुनंदा निकम यांनी चौघांना पत्ता देण्यास नकार दिला. त्याच रागातून चौघींनी मिळून सुनंदा निकम यांना लाथाबुक्क्यांनी मारहाण केली.
चौघा महिलांनी केली मारहाण
‘माझ्या आजीला मारू नका’ असे बोलल्याने त्यांची नात वंक्षिकालाही चौघा महिलांनी मारहाण केली. त्यांच्या झटापटीत सुनंदा निकम यांच्या गळ्यातील सोन्याची चेन आणि नाकातील नथ तोडून नुकसान झाले. त्यानंतर सुनंदा निकम यांनी जळगाव तालुका पोलीस ठाण्यात धाव घेत दिलेल्या तक्रारीवरून चारही महिलांविरुध्द गुन्हा दाखल केला आहे. तपास पो.हे.कॉ. जितेंद्र तायडे करत आहेत.
