शिवणी-ताळसवाडा मार्गावर ऑटोचालकाचा गळा आवळून निर्घृण खून; परिसरात भीतीचे वातावरण
साईमत /मलकापूर/प्रतिनिधी :
शिवणी ते ताळसवाडा मार्गावर एका व्यवसायिक ऑटोचालकाचा निर्घृण खून झाल्याची धक्कादायक घटना गुरुवार, दि. ८ जानेवारी रोजी समोर आली. मृतकाची ओळख अमोल भाऊराव भवरे (वय ३५) अशी झाली असून, प्राथमिक तपासात त्याचा गळा आवळल्याचे स्पष्ट झाले आहे. खुन झाल्यानंतर मृतदेह रस्त्याच्या कडेला फेकल्याने परिसरात भीती आणि खळबळ पसरली आहे.
घटना सकाळच्या सुमारास उघडकीस आली. नागरिकांना संशयास्पद अवस्थेत मृतदेह दिसल्याने त्यांनी तात्काळ पोलीस यंत्रणेला सूचित केले. पोलिस पथक घटनास्थळी पोहोचून पंचनामा करून शवविच्छेदनासाठी मृतदेह पाठविला. प्राथमिक तपासानुसार, मृतकाच्या गळ्यावर जोरदार आघात झाल्याचे खुणा आढळल्या असून, या घटनेला खून असल्याचा संशय बळावलेला आहे.
मृतक अमोल भवरे हा व्यवसायाने ऑटो चालक असून, त्याच्या वैयक्तिक तसेच व्यावसायिक संबंधांबाबत तपास सुरु आहे. पोलीस सीसीटीव्ही फुटेज, मृतकाचे शेवटचे संपर्क, तसेच संभाव्य वाद यांचा अभ्यास करत आहेत.
घटनेमुळे स्थानिक नागरिक आणि ऑटोचालकांमध्ये तीव्र संताप व्यक्त झाला आहे. पोलिसांनी दिलेल्या माहितीनुसार, आरोपींचा शोध लवकरच लागेल, आणि तपास सुरू असल्याचे सांगण्यात आले.
परिसरातील नागरिकांनी सुरक्षिततेसाठी अधिक खबरदारी घेण्याचे आवाहन केले आहे, तर पोलीस तपासात येणाऱ्या प्रत्येक सूचनेला प्राधान्य देत आहेत.
