सुरगाणा तालुक्यातील मालगोंदा येथील खळबळजनक घटना
साईमत/नाशिक/प्रतिनिधी :
सुरगाणा तालुक्यातील मालगोंदा येथे एका पत्नीने आपल्या पतीची कुऱ्हाडीने वार करून हत्या केली. इतकेच नव्हे तर तिने त्याचे तुकडे करून ते घरातच पुरल्याची घटना उघडकीस आल्याने परिसरात भीतीचे वातावरण पसरले आहे. इंदोरच्या राजा रघुवंशी हत्या प्रकरणाची घटना ताजी असतानाच, ही घटना समोर आली आहे. दरम्यान, यशवंत मोहन ठाकरे असे हत्या झालेल्या व्यक्तीचे नाव आहे.
सुरगाणा तालुक्यातील मालगोंदा येथील यशवंत ठाकरे हे रहिवासी होते. त्यांच्या पत्नीनेच त्यांची हत्या केली. आपला मुलगा दोन महिन्यांपासून गुजरातमध्ये मजुरीसाठी गेला. तो अजूनही परत न आल्याने यशवंतच्या आई-वडिलांनी सुनेकडे विचारणा केली. मात्र, तिने उडवाउडवीची उत्तरे दिली. दरम्यान, सून स्वतः गुजरातच्या बिलीमोरा येथे निघून गेली. त्यामुळे घरच्यांना संशय आला. यशवंत न परतल्याने त्यांनी अधिक चौकशी करण्याचा प्रयत्न केला. पण काहीच माहिती मिळू शकली नाही. अखेर, यशवंतच्या भावाची पत्नी प्रभाला भेटायला आली. त्यावेळी तिला काहीतरी संशयास्पद वाटले. तिने ही गोष्ट आपल्या नवऱ्याला सांगितली. त्यानंतर हे प्रकरण उघडकीस आले.
पोलिसांनी अधिक तपास केला. तेव्हा घराच्या शोषखड्ड्यात यशवंतचा मृतदेह आढळून आला. पोलिसांनी गोणीतील तुकडे असलेला मृतदेह ताब्यात घेतला. घरातील शोषखड्यात त्याचा मृतदेह आढळून आला, असे पोलिसांनी सांगितले. याप्रकरणी अधिक तपास सुरगाणा पोलीस करत आहेत. या घटनेमुळे परिसरात एकच खळबळ उडाली आहे.
पत्नीने का केली पतीची हत्या? पोलिसांकडून तपासाला वेग
सोनम रघुवंशी हिने हनिमूनला गेल्यानंतर प्रियकराच्या मदतीने राजा रघुवंशी या आपल्या पतीची हत्या केल्याच्या घटनेने देशभर खळबळ उडाली आहे. सोनमच्या क्रूरतेची घटना ताजी असतानाच नाशिकमधून ही घटना समोर आल्याने खळबळ उडाली आहे. कोणत्या कारणातून महिलेने आपल्या पतीची हत्या केली, त्याचा पोलिसांकडून वेगाने तपास सुरु आहे.
