यावल तालुका मतदान जनजागृती सेलिब्रिटी डॉ.नरेंद्र महाले यांची माहिती
साईमत/यावल/प्रतिनिधी
जिल्हाधिकारी आयुष प्रसाद यांच्या संकल्पनेतून तसेच जिल्हा स्वीप नोडल अधिकारी अकलाडे, जिल्हा सहाय्यक स्वीप नोडल अधिकारी, प्राथमिकचे शिक्षणाधिकारी विकास पाटील, माध्यमिकच्या शिक्षणाधिकारी कल्पना चव्हाण यांच्या मार्गदर्शक सूचनेनुसार संपूर्ण जिल्ह्यात मतदान जनजागृतीपर कार्यक्रम राबविला जात आहे. त्यात प्रामुख्याने रावेर विधानसभा मतदारसंघात प्रत्येक मतदारास जागृत करतांना, माहिती देतांना त्यांच्याकडून सकारात्मक प्रतिसाद मिळाल्याची माहिती यावल तालुका मतदान जनजागृती सेलिब्रिटी डॉ.नरेंद्र महाले यांनी दिली.
विधानसभेच्या निवडणुका २० नोव्हेंबरला असल्याने यावल-रावेर तालुक्यात प्रबोधनाचे कार्य शिक्षण विभागाच्यावतीने रोज नियोजनबद्ध रितीने होत आहे. त्यामध्ये प्रत्येक मतदारांमध्ये मतदानाची जागृती करत असताना ठिकठिकाणी मतदानाच्या संदर्भात प्रबोधन केले जात आहे. त्यामध्ये मतदान करणाऱ्या प्रत्येक मतदाराला त्याच्या कर्तव्याविषयी जाणीव करून दिली जात आहे. मतदानाची टक्केवारी वाढावी, यासाठी विशेष गाण्यांच्या माध्यमातून, नाटिकांच्या माध्यमातून प्रबोधनाचे कार्य सुरू आहे. त्यासाठी यावल बसस्थानक परिसरात प्रवासी स्त्री-पुरुष मतदारांमध्ये प्रबोधनाचे कार्य खूप चांगल्या पद्धतीने झाले. याप्रसंगी यावलच्या तहसीलदार मोहनमाला नाझीरकर, यावल पंचायत समितीच्या बीडीओ डॉ. मंजुश्री गायकवाड, गटशिक्षणाधिकारी विश्वनाथ धनके यांचे सहकार्य लाभत आहे.
रावेर मतदारसंघात प्रबोधनासह समाजसेवेचे काम कौतुकास्पद
यावल तालुक्याचे मतदान प्रबोधन सेलिब्रिटी म्हणून शिक्षण विभागाच्यावतीने डॉ.नरेंद्र महाले हे प्रबोधनाचे कार्य आपल्या उत्कृष्ट भाषा शैलीत करत आहेत.त्यांच्यासोबत यावल येथील सरस्वती विद्या मंदिर मंदिरातील मुख्याध्यापक जी. डी.कुलकर्णी हे प्रबोधनाचे कार्य करीत आहे. यावल आगाराचे व्यवस्थापक दिलीप महाजन यांनी प्रबोधनांमध्ये सक्रिय सहभाग नोंदविला. रावेर विधानसभा मतदार संघात भरघोस मतदान होण्यासाठी गटशिक्षणाधिकारी विश्वनाथ धनके यांचे योगदान लाभत आहे. लोकशाही राज्यात महत्त्वाचे दान म्हणजे मतदान करण्यासाठी प्रबोधनासह समाजसेवेचे काम रावेर मतदारसंघात अत्यंत कौतुकास्पद पद्धतीने सुरू आहे. यावल येथील सरस्वती विद्यामंदिराच्या पुढाकाराने सामाजिक कार्याची जाणीव मतदारांना होत आहे. त्यामुळे मतदान जनजागृती उपक्रमातील संपूर्ण टीमचे सर्वत्र कौतुक होत आहे.
