साईमत मुंबई प्रतिनिधी
महाराष्ट्र शासनाने (Maharshtra Government) राज्यातील 9 वैद्यकीय महाविद्यालयांना (Medical College) मान्यता दिली आहे. त्यामुळे राज्यात नवीन वैद्यकीय महाविद्यालये सुरू झाल्याने एमबीबीएस अभ्यासक्रमाच्या जागाही वाढणार आहेत. नवीन महाविद्यालयांना मान्यता मिळाल्यानंतर एमबीबीएसच्या (MBBS) 900 जागा वाढणार आहेत. आता महाराष्ट्रात वैद्यकीय महाविद्यालयांची संख्या 32 झाली आहे. गेल्या वर्षीच्या अर्थसंकल्पात महाराष्ट्रात 12 नवीन वैद्यकीय महाविद्यालयांना मंजुरी देण्यात आली होती.
महाराष्ट्रातील गडचिरोली, भंडारा, बुलढाणा, वाशीम, वर्धा, अमरावती, जालना, ठाणे आणि पालघर जिल्ह्यात वैद्यकीय महाविद्यालये सुरू होणार आहेत. नवीन महाविद्यालयांच्या स्थापनेबाबत राज्य शासनाने शासन निर्णय (जीआर) काढला आहे. नवीन वैद्यकीय महाविद्यालये सुरू झाल्यानंतर राज्यात एमबीबीएसच्या 900 जागाही वाढतील, असे त्यात म्हटले आहे.
नीट परीक्षा आयोजित करण्याची आणि वैद्यकीय महाविद्यालयांमध्ये प्रवेशासाठी निकाल जारी करण्याची प्रक्रिया नॅशनल टेस्टिंग एजन्सीने पूर्ण केली आहे. तर समुपदेशनाची प्रक्रिया मेडिकल कौन्सिल कमिटी म्हणजेच MCC द्वारे केली जाते. वैद्यकीय महाविद्यालयातील प्रवेशासाठी समुपदेशनाचे वेळापत्रक एमसीसीने जाहीर केले आहे.
20 जुलै 2023 पासून समुपदेशनाच्या पहिल्या फेरीसाठी अर्ज करू शकता. नोंदणीसाठी 25 जुलैपर्यंत वेळ आहे. पहिल्या फेरीसाठी जागा वाटपाचा निकाल 29 जुलै 2023 रोजी प्रसिद्ध होईल. तर, कागदपत्रे अपलोड करण्याची तारीख 30 जुलै 2023 आहे. वेळापत्रक तपासण्यासाठी, अधिकृत वेबसाइट mcc.nic.in ला भेट द्यावी लागेल.
