८,९३१ दिवस सत्तेवर; पवन कुमार चामलिंग यांचा विक्रम मोडीत काढला; डिजिटल आणि राजकीय वर्चस्व कायम
साईमत / नवी दिल्ली / प्रतिनिधी
पंतप्रधान नरेंद्र मोदी यांनी भारतीय राजकारणात एक ऐतिहासिक टप्पा गाठला आहे. देशातील कोणत्याही निवडून आलेल्या सरकारचे ‘सर्वाधिक काळ प्रमुख’ म्हणून पद भूषवणारे ते पहिले नेते ठरले आहेत. सत्तेच्या सर्वोच्च पदावर त्यांचे ८,९३१ दिवस पूर्ण झाले आहेत.
मोदींच्या या कामगिरीमुळे सिक्कीमचे माजी मुख्यमंत्री पवन कुमार चामलिंग (८,९३० दिवस) यांचा विक्रम मोडीत काढला आहे. गुजरातचे मुख्यमंत्री आणि नंतर भारताचे पंतप्रधान असा दोन्ही कार्यकाळ मिळून मोदींनी हा टप्पा गाठला असून, त्यांनी सत्ताप्रमुख म्हणून २५व्या वर्षात पदार्पण केले आहे.
मोदींच्या कारकिर्दीत अनेक महत्त्वपूर्ण विक्रम नोंदले गेले आहेत. ते गुजरातचे सर्वाधिक काळ सेवा देणारे मुख्यमंत्री आहेत. स्वतंत्र भारतात जन्मलेले देशाचे पहिले पंतप्रधान आहेत आणि २०१४, २०१९, २०२४ अशा सलग तीन लोकसभा निवडणुकांमध्ये विजय मिळवून त्यांनी आपले राजकीय वर्चस्व अबाधित ठेवले आहे.
गुजरातचे नेतृत्व त्यांनी ७ ऑक्टोबर २००१ रोजी स्वीकारले आणि सलग १३ वर्षे राज्याचे नेतृत्व केले. २१ मे २०१४ रोजी मुख्यमंत्रीपदाचा राजीनामा दिल्यानंतर २६ मे २०१४ रोजी भारताचे १४वे पंतप्रधान म्हणून शपथ घेतली. पूर्ण बहुमतासह सत्तेत येणारे ते पहिले बिगर-काँग्रेस नेते ठरले आणि सलग तीन कार्यकाळ पूर्ण केले.
डिजिटल विश्वातही पंतप्रधान मोदींची लोकप्रियता लक्षणीय आहे. YouTube चॅनेलवर ३० दशलक्ष सबस्क्राइबर्स, Instagram वर १०.१ कोटी आणि X (Twitter) वर १०.६ कोटी फॉलोअर्ससह त्यांनी जागतिक स्तरावर आपले स्थान मजबूत केले आहे.
