स्व. मोतीभाऊ जैन यांच्या स्मरणार्थ पिंप्राळा स्मशानभूमीत वृक्षारोपणनागरिकांसाठी सिमेंट बेंचचे लोकार्पण
साईमत/ जळगाव/ प्रतिनिधी
पर्यावरण संवर्धनाचा संदेश देत जळगाव शहरातील पिंप्राळा स्मशानभूमी परिसरात वृक्षारोपणाचा उपक्रम राबविण्यात आला. स्वर्गीय मोतीभाऊ जैन यांच्या स्मरणार्थ नगरसेवक अमर जैन यांच्या सौजन्याने तसेच भवरलाल आणि कांताई जैन फाउंडेशन व जळगाव शहर महानगरपालिकेच्या सहकार्याने हा उपक्रम आयोजित करण्यात आला. यावेळी परिसरात वृक्षारोपणासह नागरिकांसाठी सिमेंट बेंचचेही लोकार्पण करण्यात आले.
स्मशानभूमी परिसर हरित आणि स्वच्छ ठेवण्याच्या उद्देशाने भवरलाल आणि कांताई जैन फाउंडेशनतर्फे सुमारे ५० झाडांची रोपे उपलब्ध करून देण्यात आली होती. या रोपांचे मान्यवरांच्या हस्ते रोपण करण्यात आले. वृक्षारोपणामुळे परिसरात हरित वातावरण निर्माण होण्यास मदत होणार असून पर्यावरण संवर्धनाचा सकारात्मक संदेश समाजापर्यंत पोहोचविण्याचा प्रयत्न या उपक्रमातून करण्यात आला.
या कार्यक्रमाला शहरातील अनेक मान्यवरांनी उपस्थिती लावली. यावेळी जळगावच्या महापौर दीपमाला काळे, उपमहापौर मनोज चौधरी, स्थायी समितीचे सभापती डॉ. चंद्रशेखर पाटील, माजी महापौर सीमा भोळे, नगरसेवक सुरेश सोनवणे, नगरसेवक अमर जैन तसेच जाकीर खान यांच्यासह अनेक नागरिक उपस्थित होते. उपस्थित मान्यवरांच्या हस्ते वृक्षारोपण करून पर्यावरण संवर्धनाचे महत्त्व अधोरेखित करण्यात आले.
याच प्रसंगी स्मशानभूमीत येणाऱ्या नागरिकांना बसण्यासाठी सोयीस्कर ठराव्यात या उद्देशाने उभारण्यात आलेल्या सिमेंट बेंचचे लोकार्पण करण्यात आले. त्यामुळे येथे येणाऱ्या नागरिकांना काही काळ विश्रांती घेण्यासाठी सुविधा उपलब्ध होणार आहे.
कार्यक्रमादरम्यान उपस्थित मान्यवरांनी पर्यावरण संवर्धनाचे महत्त्व अधोरेखित करत अधिकाधिक वृक्षारोपण करण्याचे आवाहन केले. शहरात हरित पट्टा वाढविण्यासाठी नागरिकांनीही पुढाकार घेण्याची गरज असल्याचे मत यावेळी व्यक्त करण्यात आले.
