पुणे : प्रतिनिधी
इंदापूर तालुक्यात एक शिकाऊ विमान कोसळल्याची ( plane crashed )धक्कादायक घटना घडली आहे. कडबनवाडी येथे हे शिकाऊ विमान कोसळले आहे. सुदैवाने या अपघातात कुठलीही जीवितहानी झाली नाही. या विमानात एक महिला पायलट प्रशिक्षण घेत होती. बारामतीतील विमानतळावरून सकाळी या विमानाने उड्डाण केले होते. तांत्रिक बिघाडामुळे हा अपघात झाला असल्याचे सांगण्यात येत आहे. बारामतीत ‘कार्व्हर एव्हिएशन’ मार्फत महिला पायलट यांना प्रशिक्षण दिले जाते. आज सकाळी बारामतीतून विमानतळावरून उड्डाण केलेले हे विमान अचानक कडबनवाडी येथील शेतकरी बारहाते यांच्या शेतात कोसळले.
ही घटना समजताच शेजारील पोंदकुले वस्तीवरील तरुण त्या ठिकाणी पोहचले. त्यांनी महिला पायलटला सुरक्षितरीत्या बाहेर काढले. या महिला पायलटला किरकोळ जखमा झाल्या आहेत. त्यांना औषधोपचार करून शेळगाव येथील नवजीवन हॉस्पिटलमध्ये दाखल करण्यात आले. विमानाची मात्र खूप दुरावस्था झाली आहे. या ठिकाणी बारामतीमधून अधिकाऱ्यांचे व कर्मचाऱ्यांचे पथक पोहचले. त्यांनी घटनास्थळाची पाहणी केली.
