मृतात धरणगाव तहसील कार्यालयातील कर्मचाऱ्याचा समावेश : नागरिकांचा संताप
साईमत/जळगाव/प्रतिनिधी :
शहरातील शिवकॉलनी चौकात रविवारी, १ जून रोजी दुपारी ३ वाजेच्या सुमारास एका भरधाव चारचाकी वाहनाने रस्ता ओलांडणाऱ्या पादचाऱ्याला चिरडल्याची धक्कादायक घटना घडली. अपघातात धरणगाव येथील तहसील कार्यालयात कार्यरत शिपायाचा जागीच मृत्यू झाल्याचे प्रत्यक्षदर्शींनी सांगितले. दरम्यान, त्यांच्या अपघाती निधनामुळे परिसरातील नागरिकांमध्ये तीव्र संताप व्यक्त होत आहे.
सविस्तर असे की, मयत विशाल रमेश सोनार (वय ४४) हे रविवारी दुपारी शिवकॉलनी चौकात रस्ता ओलांडत असताना खोटेनगरकडून येणाऱ्या एका भरधाव चारचाकी वाहनाने त्यांना जोरदार धडक दिली. धडक इतकी जबरदस्त होती की, त्यात त्यांचा अक्षरश: चेंदामेंदा झाला. अपघाताची माहिती मिळताच अपघातस्थळी जिल्हापेठ पोलीस ठाण्याचे कर्मचारी आणि वाहतूक शाखेचे पथक तातडीने दाखल झाले होते. त्यांनी वाहतूक सुरळीत करण्याचे काम केले. दरम्यान, वाहन चालकाने घटनास्थळाहून पळ काढला असल्याचे सांगण्यात आले.
शिवकॉलनी चौक ठरतोय अपघाताला ‘निमंत्रण’
शहरातील राष्ट्रीय महामार्गावरील असणारा शिवकॉलनी चौक हा अपघातांना ‘निमंत्रण’ देणारा ठरला आहे. काही महिन्यांपूर्वी याच ठिकाणी झालेल्या एका गंभीर अपघातानंतर स्थानिक नागरिकांनी रस्त्यावर उतरून तीव्र आंदोलन छेडले होते. त्यानंतर प्रशासनाने चौकात गतिरोधक आणि सिग्नल यंत्रणा बसविण्याचा निर्णय घेतला होता. त्यानुसार, गतिरोधक आणि सिग्नल यंत्रणा कार्यान्वितही केली होती. मात्र, उन्हाळ्यात गतिरोधकांचे डांबर वितळल्याने ते प्रभावहीन झाले आहे. अशातच रविवार असल्याने सिग्नल यंत्रणा बंद असल्याची माहिती अपघातस्थळी स्थानिक नागरिकांनी दिली. त्यामुळे संबंधितांच्या केलेल्या कामावर नागरिकांनी संताप व्यक्त केला आहे.
