शहर पोलीस ठाण्यात तिघांविरुध्द गुन्हा दाखल
साईमत/जळगाव/प्रतिनिधी :
शहरातील छत्रपती शिवाजी नगर येथे जुना वाद उफाळल्यावरुन एका तरूणाला तीन जणांनी शिवीगाळ करत चाकूने वार करून दुखापत केली. तसेच इतरांनी मोठा दगड पायावर टाकल्याने पाय फ्रॅक्चर केल्याची घटना २३ मे रोजी रात्रीच्या सुमारास घडली. याप्रकरणी २४ मे रोजी जळगाव शहर पोलीस ठाण्यात तिघांविरुध्द गुन्हा दाखल केला असल्याचे पोलिसांनी सांगितले.
सविस्तर असे की, गजानन विकास बाविस्कर (वय ३०, रा. छत्रपती शिवाजी नगर, हुडको, जळगाव) हा तरूण आपल्या कुटुंबियांसह वास्तव्याला आहे. तो खासगी कंपनीत नोकरीला आहे. २३ मे रोजी रात्री ९.३० वाजता जुन्या वादातून मनिष रामू बिऱ्हाडे, संगम देवा भोई आणि क्रिष्णा पांडूरंग सोनवणे (सर्व राहणार जळगाव) यांनी शिवीगाळ करत चाकूने गजाननच्या डोक्यावर व हातावर वार केले. इतरांनी त्यांच्या छातीवर आणि पायावर दगड टाकून पाय फ्रॅक्चर केला.
मारेकरी घटनास्थळाहून झाले पसार
ही घटना घडल्यानंतर मारेकरी घटनास्थळाहून पसार झाले. जखमीला जिल्हा शासकीय रूग्णालयात उपचारार्थ दाखल केले आहे. याप्रकरणी गजानन बाविस्कर यांनी दिलेल्या फिर्यादीवरून तिघांवर गुन्हा दाखल केला आहे. तपास पो.हे.कॉ. ओमप्रकाश सोनी करीत आहे.
