साईमत प्रतिनिधी
जळगाव शहराजवळील नशिराबाद टोल नाक्याजवळ मंगळवारी (दि. २८ ऑक्टोबर) दुपारी घडलेल्या भीषण बस अपघातात एका महिला प्रवाशाचा दुर्दैवी मृत्यू झाला होता. या प्रकरणी पोलिसांनी बसचालकावर निष्काळजीपणे वाहन चालविल्याबद्दल गुन्हा दाखल केला आहे.
अमळनेर आगाराची बस (क्र. एमएच-१४ बीटी-२३०६) ही मंगळवारी दुपारी सुमारे १२.३० वाजता जळगाववरून भुसावळच्या दिशेने जात असताना नशिराबाद टोल नाक्याजवळ अपघातग्रस्त झाली. प्रवासादरम्यान बसच्या समोरील टायरांपैकी एक टायर अचानक फुटल्याने वाहनावरील चालकाचे नियंत्रण सुटले. त्यामुळे बस भरधाव वेगात भरकटत जाऊन थेट टोल नाक्याजवळील भिंतीवर आदळली.
अपघाताचा जोरदार धक्का बसताच बसमधील अनेक प्रवासी घाबरून गेले. त्याचवेळी पाडळसा (ता. यावल) येथील साराबाई गणेश भोई (वय ४६) या महिला प्रवासी खिडकीतून बाहेर फेकल्या गेल्या. दुर्दैवाने त्या बसच्या मागील चाकाखाली आल्याने जागीच ठार झाल्या. अपघातानंतर घटनास्थळी मोठी गर्दी झाली आणि बचावकार्य तातडीने सुरू करण्यात आले.
साराबाई भोई यांना तत्काळ जळगाव शासकीय वैद्यकीय महाविद्यालयात नेण्यात आले. मात्र, डॉक्टरांनी त्यांना मृत घोषित केले. घटनेची माहिती मिळताच मृत महिलेचे नातेवाईक रुग्णालयात धाव घेऊन आले. त्या ठिकाणी एकच हळहळ आणि शोककळा पसरली होती.
या प्रकरणी मृत महिलेचा मुलगा किरण गणेश भोई यांनी दिलेल्या फिर्यादीवरून बस चालक किशोर रामचंद्र जावळे (रा. भुसावळ) याच्याविरुद्ध नशिराबाद पोलीस ठाण्यात निष्काळजीपणे वाहन चालवून मृत्यू ओढवल्याचा गुन्हा दाखल करण्यात आला आहे. पोलिसांनी अपघातस्थळाचा पंचनामा करून पुढील तपास सुरू केला आहे.
घटनेनंतर पोलिसांनी बसचा ताबा घेतला असून टायर फुटण्याचे नेमके कारण शोधण्यासाठी वाहनाची तांत्रिक तपासणी सुरू आहे. अपघाताचा अहवाल मिळाल्यानंतर दोषींवर पुढील कायदेशीर कारवाई करण्यात येणार असल्याचे पोलिसांनी सांगितले.
या अपघातामुळे परिसरातील नागरिकांमध्ये संतापाचे वातावरण आहे. टोल नाक्याजवळील वाहतूक नियंत्रण आणि बसचालकांच्या निष्काळजीपणाविरोधात स्थानिकांनी तातडीने उपाययोजना करण्याची मागणी केली आहे.
दरम्यान, या घटनेच्या पार्श्वभूमीवर वाहतूक विभाग व परिवहन खात्याने बसांची नियमित तपासणी, टायरांच्या स्थितीची पडताळणी आणि चालकांचे प्रशिक्षण याकडे अधिक लक्ष देण्याची गरज असल्याचे नागरिकांनी व्यक्त केले आहे.
नशिराबाद टोल नाक्याजवळील या दुर्दैवी अपघाताने पुन्हा एकदा निष्काळजी वाहनचालकांबाबत प्रश्नचिन्ह उपस्थित केले आहे. एका निष्पाप महिलेचा जीव गमावल्याने परिसरात हळहळ व्यक्त होत असून, या घटनेतून प्रशासन आणि परिवहन विभागाने धडा घ्यावा, अशी अपेक्षा नागरिकांकडून व्यक्त केली जात आहे.
