साईमत, मुक्ताईनगर : प्रतिनिधी
शहरातील मध्यवर्ती ठिकाण असणाऱ्या प्रवर्तन चौकातील दोन ते तीन दुकानांना गुरुवारी, ३० नोव्हेंबर रोजी रात्री अचानक लागलेल्या आगीत लाखो रूपयांचे नुकसान झाले आहे. ही आग नेमकी कशामुळे लागली? त्याची माहिती अद्यापपर्यंत मिळालेली नाही. दरम्यान, शहराच्या मध्यवर्ती ठिकाणी आग लागल्याने परिसरात बराच वेळ गोंधळ उडाला होता. तसेच नगरपंचायतीकडे अग्निशमन दलाची गाडी नसल्याने मदतकार्यात अडचणी आल्यामुळे संताप व्यक्त करण्यात आला.
सविस्तर असे की, मुक्ताईनगर शहरात मधोमध असणाऱ्या प्रवर्तन चौकालगतच दोन ते तीन दुकानांना गुरुवारी रात्री अचानक आग लागली. या दुकानांमधून आगीचे लोळ उठतांना दिसताच परिसरातील नागरिकांनी धाव घेऊन आग विझविण्यासाठी प्रयत्न सुरू केले. आगीत बूट, चप्पलचे दुकान तसेच गोळी-बिस्किट, पान मसाल्याचे दुकान, किराण्याचे दुकान जळून खाक झाले आहे. दरम्यान, नागरिकांच्या प्रयत्नांनी अग्निशमन पथकाची गाडी येण्यापूर्वीच आग आटोक्यात आली. आगीत सुमारे सहा ते सात लाख रूपयांचे नुकसान झाल्याची प्राथमिक माहिती समोर आली आहे. घटनास्थळी मुक्ताईनगर पोलीस स्टेशनचे पोलीस निरीक्षक नागेश मोहिते आणि त्यांच्या सहकाऱ्यांनी तात्काळ धाव घेत मदतकार्य केले. त्यामुळे काही मिनिटांमध्ये आग आटोक्यात आणता आली.
डीपीडीसीतून अग्निशमन दलाच्या गाडीसाठी अद्याप निधी नाही….
मुक्ताईनगर येथे यापूर्वीही दोन-तीन वेळा आगीच्या घटना घडल्या आहेत. त्यामुळे आग लागल्यावर सावदा, वरणगाव, भुसावळ, बोदवड येथून अग्निशमन दलाची गाडी मागवावी लागते. मुक्ताईनगरला नगरपंचायत होऊन येत्या ४ डिसेंबर रोजी सहा वर्ष पूर्ण होत आहे. मात्र, अद्यापही मुक्ताईनगर नगरपंचायतीला अग्निशमन दलाची गाडी मिळालेली नाही. जिल्हा नियोजन बैठक (डीपीडीसी) मधून अग्निशमन दलाची गाडी घेण्यासाठी निधीची मागणी केली होती. परंतु निधी मिळाला नसल्याचे नगरपंचायतीचे मुख्याधिकारी गजानन तायडे यांनी सांगितले.
