अमळनेर पोलिसांची धडक कारवाई; २४ दुचाकींसह १५ लाखांचा मुद्देमाल जप्त
साईमत/अमळनेर /प्रतिनिधी :
अमळनेर शहरासह परिसरात वाढत्या मोटारसायकल चोरीच्या घटनांचा छडा लावत पोलिसांनी दोन आरोपींना जेरबंद केले असून, त्यांच्या ताब्यातून तब्बल २४ मोटारसायकली जप्त करण्यात आल्या आहेत. जप्त वाहनांची एकूण किंमत सुमारे १५ लाख ६३ हजार रुपये असून, या यशस्वी कारवाईने अमळनेर पोलिसांनी मोठे यश मिळवले आहे.
ही कारवाई पोलिस अधीक्षक डॉ. महेश्वर रेड्डी, अप्पर पोलिस अधीक्षक कविता नेरकर (चाळीसगाव विभाग) आणि उपविभागीय पोलिस अधिकारी विनायकराव कोते यांच्या मार्गदर्शनाखाली पोलिस निरीक्षक दत्तात्रय निकम यांच्या नेतृत्वाखाली करण्यात आली. अमळनेर पोलिस स्टेशन गुन्हे शोध पथकातील पोलीस उपनिरीक्षक शरद काकळीज, पोकॉ प्रशांत पाटील, गणेश पाटील, उज्वलकुमार म्हसके, नितीन मनोरे, उज्वल पाटील आणि हितेश बेहरे यांनी ही कारवाई केली.अमळनेर पोलीस ठाण्यात नोंद असलेल्या गुन्हा क्रमांक ३०८/२०२५, २९९/२०२५ आणि २३३/२०२५ भारतीय न्याय संहिता कलम ३०३(२) अंतर्गत दाखल मोटारसायकल चोरीच्या गुन्ह्यांचा तपास सुरू असताना पोलिसांना परिसरातील सीसीटीव्ही फुटेज, तांत्रिक माहिती आणि डंप डेटा यांच्या आधारे संशयितांची माहिती मिळाली.
त्यानुसार अमळनेर परिसरातील तसेच इतर ठिकाणांवरील चोरीत सहभागी असलेले आरोपी हिमंत रहज्या पावरा आणि अंबालाल भुरट्या खरर्ड (दोन्ही रा. सातपिंप्री, ता. शहादा, जि. नंदुरबार) हे असल्याचे स्पष्ट झाले.
पोलिसांनी मोठ्या शिताफीने धडगाव (जि. नंदुरबार) येथील डोंगराळ व जंगल परिसरात सापळा रचून दोन्ही आरोपींना ताब्यात घेतले. चौकशीत त्यांनी अमळनेर तसेच इतर पोलीस ठाण्यांच्या हद्दीत मोटारसायकली चोरी केल्याची कबुली दिली. आरोपींच्या मार्गदर्शनाखाली पोलिसांनी सातपिंप्री परिसरातील जंगलात जाऊन लपवलेल्या सर्व मोटारसायकली हस्तगत केल्या.
जप्त वाहनांमध्ये होंडा, बजाज, टीव्हीएस या नामांकित कंपन्यांच्या २४ मोटारसायकली असून त्यांची एकूण किंमत १५ लाख ६३ हजार रुपये इतकी आहे. जप्तीचा पंचनामा करून सर्व मोटारसायकली अमळनेर पोलीस ठाण्यात आणण्यात आल्या आहेत. आरोपींना अमळनेर पोलीस ठाण्याच्या गुन्हा क्रमांक ३०८/२०२५ अंतर्गत अटक करण्यात आली असून, या प्रकरणाचा पुढील तपास पोहेकॉ काशिनाथ पाटील आणि पोकॉ सागर साळुंखे हे करीत आहेत.
