एमआयडीसी पोलिसात अज्ञात वाहनचालकाविरुद्ध गुन्हा दाखल
साईमत/जळगाव/प्रतिनिधी :
शहरापासून जवळील कुसुंबा शिवार परिसरात भरधाव अज्ञात वाहनाने दिलेल्या धडकेत सोनू बारेला (वय ४५, मूळ रा. शिरवेल महादेव, जि. खरगोन, मध्यप्रदेश, ह.मु. कुसुंबा शिवार) यांचा जागीच मृत्यू झाला. हा अपघात १५ मे रोजी गोशाळेसमोर घडला. याप्रकरणी एमआयडीसी पोलीस ठाण्यात अज्ञात वाहनचालकाविरुद्ध गुन्हा दाखल केला आहे.
सविस्तर असे की, मध्यप्रदेशातील रहिवासी सोनू बारेला हे कुसुंबा शिवारातील एका शेतात वास्तव्यास होते. ते १५ मे रोजी पायी जात असताना भरधाव वेगात आलेल्या एका अज्ञात वाहनाने त्यांना जोरदार धडक दिली. त्यात ते गंभीर जखमी झाले आणि त्यांचा जागीच मृत्यू झाला. अपघातानंतर वाहनचालक आपले वाहन घेऊन घटनास्थळावरून फरार झाला. त्यानंतर मयताचा मुलगा नीलेश सोनू बारेला याने एमआयडीसी पोलिसात अज्ञात वाहनचालकाविरुध्द तक्रार दाखल केल्यावरुन गुन्हा दाखल केला आहे.
