साईमत जळगाव प्रतिनिधी
शहरातील एमआयडीसी परिसरात ६१ गॅस सिलेंडर चोरीला गेलेल्या प्रकरणाचा एमआयडीसी पोलीस ठाण्याने केवळ तीन दिवसांत उलगडा करत दोन आरोपींना वाहनासह जेरबंद केले. पोलिसांनी तब्बल १ लाख २२ हजार रुपये किमतीचा ६१ सिलेंडरांचा मुद्देमाल तसेच ५ लाख रुपये किमतीचे आयशर वाहन जप्त केले आहे. ही कारवाई गुप्त माहितीच्या आधारे अचूक सापळा रचत करण्यात आली.
काय घडले?
फिर्यादी यांनी १४ नोव्हेंबर रोजी भारत पेट्रोलियम जळगाव येथून ३४२ सिलेंडर भरून ट्रक एमआयडीसी परिसरात पार्क केला होता. दुसऱ्या दिवशी सकाळी ते वाहन घेण्यासाठी पोहोचले असता ट्रक जागेवर नव्हता. काही अंतरावर रस्त्याच्या कडेला उभे असलेले वाहन मिळाल्यावर ३४२ पैकी ६१ सिलेंडर चोरीस गेल्याचे स्पष्ट झाले. याप्रकरणी एमआयडीसी पोलीस ठाण्यात गुन्हा क्रमांक ८४८/२०२५ भा.दं.वि. कलम ३०३(२) अन्वये गुन्हा दाखल झाला.
गुप्त माहितीवरून आरोपींना गाठले
तपासादरम्यान पोलिसांना गुप्त बातमीदारामार्फत महत्त्वाची माहिती मिळाली. त्यानुसार एमआयडीसी परिसरात सापळा रचून १८ नोव्हेंबर रोजी एका संशयिताला ताब्यात घेण्यात आले. चौकशीत आरोपीने आपले नाव शेख फिरोज शेख याकुब (रा. नशिराबाद) असे सांगत गुन्ह्याची कबुली दिली. त्याचा साथीदार सैय्यद मुश्ताक सैय्यद अशपाक (रा. उस्मानिया पार्क, जळगाव) याच्यासह मिळून ही चोरी केल्याचे त्याने उघड केले.
दोन्ही आरोपींच्या कबुलीजबाबानंतर ६१ सिलेंडर, एकूण किंमत सुमारे ₹1,22,000 आणि गुन्ह्यात वापरलेले ₹5,00,000 किमतीचे आयशर वाहन जप्त करण्यात आले.
यशस्वी कारवाईत पोलिसांचे योगदान
या संपूर्ण प्रकरणाचा उलगडा एमआयडीसी पोलीस ठाण्याचे पोलीस निरीक्षक बबन आव्हाड यांच्या सुचनांनुसार गुन्हे शोध पथकाने केला. या पथकात पोउनि राहुल तायडे, पोउनि चंद्रकांत धनके, सफौ विजयसिंग पाटील, पोह गणेश शिरसाळे, पोह प्रदीप चौधरी, पोह गिरीश पाटील, पौह प्रमोद लाडवंजारी, पोह किरण चौधरी, पोकों नितीन ठाकुर, पोकों किरण पाटील, पोकों शशिकांत मराठे आदींचा समावेश होता.
वरिष्ठांचे मार्गदर्शन
ही कारवाई पोलीस अधीक्षक डी. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे यांच्या मार्गदर्शनाखाली करण्यात आली.
एमआयडीसी हद्दीत वाढत्या चोरीच्या घटनांच्या पार्श्वभूमीवर पोलिसांनी केलेली ही कारवाई कौतुकास्पद ठरली असून तातडीने गुन्हा उघडकीस आल्याने उद्योग क्षेत्रात दिलासा व्यक्त केला जात आहे.
