शॉर्टसर्किटचा फटका बोदवडच्या जिनिंगमध्ये भीषण आग
साईमत बोदवड प्रतिनिधी
जळगाव जिल्ह्यातील बोदवड येथील जामनेर रोड परिसरात असलेल्या अरिहंत जिनिंगमध्ये अचानक लागलेल्या आगीत लाखो रुपयांचा कापूस जळून खाक झाल्याची घटना घडली. सुदैवाने या भीषण आगीत कोणतीही जीवितहानी झाली नसली तरी मोठ्या प्रमाणावर आर्थिक नुकसान झाले आहे.
मिळालेल्या माहितीनुसार, अरिहंत जिनिंगमध्ये अचानक धूर व ज्वाळा उसळू लागल्याने परिसरात एकच खळबळ उडाली. आगीचे प्रमाण वाढत असल्याचे लक्षात येताच तत्काळ अग्निशमन दलाला पाचारण करण्यात आले. घटनेची माहिती मिळताच अग्निशमन दलाचे पथक घटनास्थळी दाखल झाले आणि अथक प्रयत्नांनंतर आगीवर नियंत्रण मिळवण्यात यश आले.
या आगीत जिनिंगमधील साठवून ठेवलेला कापूस पूर्णपणे जळून खाक झाला असून नुकसान लाखो रुपयांमध्ये असल्याचा अंदाज व्यक्त करण्यात येत आहे. प्राथमिक तपासात शॉर्टसर्किटमुळे ही आग लागल्याचा अंदाज वर्तवण्यात आला आहे.
दरम्यान, या घटनेमुळे परिसरात काही काळ भीतीचे वातावरण निर्माण झाले होते. संबंधित यंत्रणेकडून घटनेचा पुढील तपास सुरू असून नुकसानाचे पंचनामे करण्यात येत आहेत.
