साईमत लाईव्ह पाचोरा प्रतिनिधी
तालुक्यातील शेवाळे येथे रक्षाबंधनानिमित्त आलेले माहेरवाशीण 20 वर्षीय विवाहितेने राहत्या घरातील स्वयंपाक घरात गळफास लावत आत्महत्या केल्याची दुर्दैवी घटना समोर आली आहे. घटनेप्रकरणी पाचोरा पोलिसात अकस्मात मृत्यूची नोंद करण्यात आली आहे.
याबाबत सविस्तर वृत्त असे की, शेवाळे येथील नानू शिवदास फादगे यांची एकुलती एक कन्या उमा नानू फादगे (वय – 20) हिचा विवाह खंडेराव नगर, जळगाव येथील रहिवाशी सनी प्रेमनाथ उमप यांचेशी शेवाळे येथे दि. 18 मे 2022 रोजी मोठ्या थाटात पार पडला. लग्नानंतर उमा ही वैवाहिक जीवनात व्यस्त झाली.
दरम्यान रक्षाबंधन सणासाठी आपल्या दोन भावंडांना राखी बांधण्यासाठी यावे म्हणून दि. 12 ऑगस्ट रोजी उमा हिचे वडिल नानू फादगे हे उमाला माहेरी घेऊन आले होते. याच दिवशी रात्री उमा ही गावात वास्तव्यास असलेली तिची मावशी शिलाबाई सोमनाथ गायकवाड यांच्या घरी झोपण्यासाठी गेली होती. दि. 13 ऑगस्ट रोजी उमा आपल्या घरी आल्यानंतर मला आंघोळीसाठी जायचे आहे असे सांगून घरातील स्नानगृहाकडे गेली. दरम्यान बराच वेळ होऊनसुद्धा उमा येत नसल्याने वडील नानू फादगे यांनी घरात शोध घेतला असता घरातील स्वयंपाक घरात उमा ही दोरीच्या सहाय्याने फाशी घेतलेल्या अवस्थेत आढळून येताच वडील नानू फादगे यांनी एकच हंबरडा फोडला.
ग्रामस्थांच्या मदतीने उमा हिस पाचोरा ग्रामीण रुग्णालयात दाखल केले असता वैद्यकीय अधिकारी डॉ. अमित साळुंखे यांनी उमा हिला मृत घोषित केले. उमा सनी उमप या विवाहितेने आत्महत्या का केली ? याचे कारण मात्र अद्याप समजू शकले नाही. मयत उमा हिचे शवविच्छेदन डॉ.अमित साळुंखे यांनी केले.घटनेप्रकरणी पाचोरा पोलिसात अकस्मात मृत्यूची नोंद करण्यात आली असून पुढील तपास पोलिस कॉन्स्टेबल राकेश खोंडे हे करित आहे.
