मुस्लिम बहुल भागात मराठी वर्तमानपत्रांचे वाचनालय सुरू
साईमत जळगाव प्रतिनिधी:
जळगाव शहरातील सुप्रीम कॉलनी परिसरात महाराष्ट्र नवनिर्माण सेनेच्या शाखेतर्फे मराठी भाषेच्या संवर्धनासाठी एक अनोखा आणि प्रेरणादायी उपक्रम राबविला गेला आहे. मुस्लिम बहुल वस्तीमध्ये मराठी वृत्तपत्रांचे वाचनालय सुरू करून सामाजिक व भाषिक एकात्मतेचा संदेश दिला जात आहे.
या वाचनालयात जळगाव शहरातून प्रकाशित होणारी सर्व प्रमुख मराठी वर्तमानपत्रे उपलब्ध करून देण्यात आली आहेत. दररोज सुमारे दहा विविध मराठी वृत्तपत्रे वाचकांसाठी उपलब्ध राहणार असून, त्यामुळे परिसरातील नागरिकांमध्ये मराठी वाचनाची गोडी निर्माण होईल आणि माहिती व ज्ञानाचा नवा दरवाजा खुला होईल, असा उद्देश या उपक्रमामागे आहे.
वाचनालयाचे उद्घाटन महाराष्ट्र नवनिर्माण सेनेचे संपर्क अध्यक्ष ढोल-ताशांच्या उत्साही वातावरणात केले. कार्यक्रमात स्थानिक नागरिकांचा उत्स्फूर्त प्रतिसाद लाभला, ज्यामुळे हा उपक्रम खऱ्या अर्थाने लोकाभिमुख ठरल्याचे दिसून आले.उद्घाटन प्रसंगी जळगाव जिल्हा संपर्क अध्यक्ष गजानन राणे यांनी बोलताना या उपक्रमाचे कौतुक करत सांगितले,
“मुस्लिम बहुल भागात मराठी वर्तमानपत्रांचे वाचनालय सुरू करणे हे केवळ भाषेच्या जतनासाठी नव्हे, तर समाजातील विविध घटकांना जोडणारा सकारात्मक पूल आहे. महाराष्ट्र नवनिर्माण सेनेचा हा उपक्रम मराठी भाषा समृद्ध करण्याच्या दिशेने एक महत्त्वपूर्ण पाऊल आहे.”
हा उपक्रम केवळ वाचनाची सवय वाढवणारा नाही, तर समाजात ऐक्य, समजूतदारपणा आणि सांस्कृतिक जवळीक निर्माण करणारा ठरणार आहे. अशा प्रकारचे उपक्रम समाजासाठी मार्गदर्शक ठरतात आणि मराठी भाषेचा गौरव अधिक उंचावतात.
कार्यक्रमात महाराष्ट्र नवनिर्माण सेनेचे जिल्हाध्यक्ष ॲड. जमील देशपांडे, महानगर अध्यक्ष विनोद शिंदे, किरण तळेले, उपमहानगराध्यक्ष श्रीकृष्ण मेंगडे, राजेंद्र निकम, ललित शर्मा, चेतन पवार, सुप्रसिद्ध कलाकार जहांगीर पेंटर, विभाग अध्यक्ष राहुल चव्हाण, विशाल जाधव, खुशाल ठाकूर, महेंद्र सपकाळे, विकास पाथरे, कल्पेश पवार, कल्पेश खैरनार, शाखा अध्यक्ष युसुफ खाटीक, बादशाह शहा आणि अनेक महाराष्ट्र सैनिक उपस्थित होते.
संपूर्ण उपक्रमातून स्पष्ट दिसून आले की, भाषिक ऐक्य आणि वाचनाची आवड यामुळे समाजात सकारात्मक बदल घडवून आणता येतो. मुस्लिम बहुल वस्तीत सुरू केलेले हे वाचनालय त्याचे उत्तम उदाहरण ठरले आहे.
