नदीपात्रात उतरून अवैध वाळू उपसा उधळून लावत सविस्तर कारवाई केली
साईमत/जळगाव/प्रतिनिधी
जिल्ह्यातील अवैध वाळू उपशावर प्रशासनाने आता आक्रमक पाऊल उचलले आहे. जळगावचे प्रांताधिकारी विनय गोसावी यांनी स्वतः नदीपात्रात उतरून अवैध वाळू उपसा उधळून लावत सविस्तर कारवाई केली. ही कारवाई आज दुपारी जळगाव तालुक्यातील वडनगरी परिसरात करण्यात आली.
प्रांताधिकारी गोसावी यांना वडनगरी परिसरात अवैध वाळू उपसा होत असल्याची गोपनीय माहिती मिळाल्यानंतर महसूल पथकाने सकाळपासूनच परिसरात पाळत ठेवली होती. संधी मिळताच, जिल्हाधिकारी रोहन घुगे यांच्या मार्गदर्शनाखाली प्रांताधिकारी व पथक थेट नदीपात्रात धाव घेतले. सुमारे तीन तास चाललेल्या मोहिमेत वाळू काढण्यासाठी वापरण्यात येणारी यंत्रसामग्री, जाळी, दोरखंड यांचा शोध घेतला आणि नष्ट करण्यात आले.
या मोहिमेत प्रांताधिकारी विनय गोसावी यांच्यासोबत मंडळ अधिकारी छाया कोळी, ग्राम महसूल अधिकारी श्री. बडगुजर, महसूल सहाय्यक तेजस सपकाळे, वडनगरीचे पोलीस पाटील आणि स्थानिक महसूल अधिकारी व कर्मचाऱ्यांचा समावेश होता. कारवाई दरम्यान जप्त केलेली सर्व यंत्रसामग्री प्रांताधिकाऱ्यांनी स्वतःच्या शासकीय वाहनातून जळगाव येथील प्रशासकीय इमारतीत जमा केली.
गावातील तरुण व पोलीस पाटील यांना अवैध वाहतुकीवर लक्ष ठेवण्याचे, तसेच संशयास्पद हालचाली दिसताच तात्काळ प्रशासनाला कळवण्याचे निर्देश देण्यात आले आहेत. प्रशासनाच्या या कठोर पावल्यामुळे अवैध वाळू उपशावर कडक खबरदारी ठेवण्याचे संदेश स्पष्ट झाले आहेत.
या कारवाईमुळे अवैध वाळू उपसा करणाऱ्यांमध्ये भीती निर्माण झाली असून, स्थानिकांना शाश्वत आणि पारदर्शक प्रशासनाची ताकद दिसून आली आहे.
