“उपमुख्यमंत्री शिंदे अनुपस्थित; तरीही जळगावमध्ये महायुती रोड शोने जनसागर लोटला”
साईमत /जळगाव/प्रतिनिधी :
जळगाव महापालिका निवडणुकीच्या पार्श्वभूमीवर आज गुरुवारी आयोजित महायुती रोड शोमध्ये राज्याचे उपमुख्यमंत्री एकनाथ शिंदे यांचा ऐनवेळी दौरा रद्द झाला. तरीही महायुतीने प्रचारात कोणताही खंड पडू दिला नाही आणि पालकमंत्री गुलाबराव पाटील यांनी प्रमुख नेत्यांसह, पदाधिकाऱ्यांना सोबत घेऊन रोड शो यशस्वीपणे राबविला. रोड शोदरम्यान महाविजय रथ यात्रेला शहरभर जनसागर लोटल्याचे दृश्य पाहायला मिळाले.
दोन दिवसापूर्वीच मुख्यमंत्री देवेंद्र फडणवीस यांच्या रोड शोनंतर, उपमुख्यमंत्री शिंदे यांचा रोड शो जळगाव शहरात जय्यत तयारीसह आयोजित करण्यात आला होता. शहरातील प्रमुख रस्त्यांवर आकर्षक स्वागत कमानी, बॅनर्स, झेंडे आणि फलक लावून संपूर्ण मार्ग भगवेमय करण्यात आला होता. कार्यकर्ते आणि पदाधिकाऱ्यांमध्ये उत्साहाचे वातावरण दिसत होते. मात्र, शिंदे यांचा दौरा अचानक रद्द झाल्याने काही कार्यकर्त्यांमध्ये नाराजीचे दृश्य निर्माण झाले.
तरीही, पालकमंत्री गुलाबराव पाटील यांनी रोड शोच्या सूत्रे आपल्या हाती घेतली. महायुतीच्या अन्य नेत्यांसह आणि सर्व प्रमुख पदाधिकाऱ्यांसह त्यांनी शहरातील विविध मार्गांवरून प्रचार रॅली काढली. ढोल-ताशांच्या गजरात आणि घोषणांच्या गजरात परिसर दणाणून गेला. या रॅलीत आमदार राजूमामा भोळे, आमदार चंद्रकांत सोनवणे, शिवसेनेचे जिल्हाप्रमुख विष्णू भंगाळे यांच्यासह महायुतीचे सर्व प्रमुख नेते, स्थानिक उमेदवार आणि पदाधिकारी मोठ्या संख्येने उपस्थित होते.
रोड शोदरम्यान पालकमंत्री पाटील यांनी महायुती सरकारच्या माध्यमातून जळगाव शहरात राबविण्यात आलेल्या विविध विकासकामांची माहिती दिली. त्यांनी सांगितले की, मुख्यमंत्री एकनाथ शिंदे यांच्या नेतृत्वाखाली राज्यात सर्वसामान्यांच्या हिताचे निर्णय घेतले जात आहेत. पायाभूत सुविधा, रस्ते, पाणी पुरवठा, आरोग्य आणि शिक्षण या क्षेत्रांमध्ये मोठ्या प्रमाणावर कामे झाली असून जळगाव शहराच्या सर्वांगीण विकासासाठी सरकार कटिबद्ध आहे.
शेवटी, पालकमंत्री गुलाबराव पाटील यांनी शिवसेना आणि महायुतीच्या उमेदवारांना मोठ्या मताधिक्याने विजयी करण्याचे आवाहन मतदारांना केले आणि रोड शो यशस्वीपणे संपन्न झाला.
