साईमत / जळगाव / प्रतिनिधी
युद्धजन्य परिस्थितीमुळे घरगुती गॅस सिलिंडरचा पुरवठा विस्कळीत झाला असून, ग्राहकांकडून सिलिंडर वेळेत मिळत नसल्याची तक्रार होत आहे. तसेच, काही घरगुती सिलिंडर व्यावसायिक कारणासाठी वापरले जात असल्याचे निदर्शनास आले आहे. यावर उपाय म्हणून जिल्हा प्रशासनाच्या विशेष पथकाने धाडसत्र राबविले.
गेल्या आठवडाभरात २८१ ठिकाणी धाडी टाकल्यानंतर घरगुती १९ सिलिंडरचा व्यावसायिक वापर स्पष्ट झाला असून, प्रशासनाने १८ हजार १३४ रुपये किमतीचे सिलिंडर जप्त केले आहेत. महसूल विभागाचे पथक ठिकठिकाणी हॉटेल, खानावळी व लहान व्यावसायिकांकडून घरगुती गॅसचा गैरवापर शोधत आहेत.
जिल्हा पुरवठा अधिकारी कार्यालयाने दि. १३ मार्चपासून गॅस कंपन्यांकडून उपलब्ध साठ्याचा दैनंदिन अहवाल घेणे सुरू केले असून, तीनही गॅस वितरण कंपन्यांकडे पुरेसा साठा उपलब्ध असल्याचे स्पष्ट झाले आहे.
दरम्यान, जळगाव शहरात एलपीजी गॅसची मागणी वाढली असून, गृहिणींच्या दैनंदिन स्वयंपाकावर याचा थेट परिणाम झाला आहे. पर्याय म्हणून घरगुती वापरासोबतच हॉटेल, खानावळी व लहान व्यावसायिकांनी इंडक्शनचा वापर वाढवला आहे. मात्र, वीजबिलाचा फटका आणि सातत्याने एजन्सीधारकांकडे विचारणा सुरू असल्यामुळे ग्राहकांना अडचणी निर्माण होत आहेत.
