पोलिसांनी वेळीच हस्तक्षेप केला
साईमत /जळगाव/प्रतिनिधी :
जळगाव महानगरपालिकेच्या सार्वत्रिक निवडणुकीसाठी आज सकाळी ७:३० वाजेपासून मतदान सुरु झाले, आणि मतदारांचा उत्साह पहायला मिळत आहे. मात्र, मतदानाच्या सुरुवातीच्या तासातच शहरात एक धक्कादायक घटना घडली.
जळगाव शहरातील एका मतदान केंद्रावर बोगस मतदान करण्याच्या संशयावरून एका तरुणाला नागरिकांनी चोप दिला. ही घटना पोलिसांच्या वेळीच हस्तक्षेपामुळे अधिक गंभीर झाली नाही. संबंधित तरुणाला तत्काळ पोलिसांनी ताब्यात घेतले आणि पुढील चौकशीसाठी पोलीस स्टेशनकडे नेले.
प्राथमिक तपासात समोर आलेल्या माहितीनुसार, हा तरुण चाळीसगाव तालुक्यातील रहिवासी असून मतदान केंद्रावर संशयास्पद वर्तन करत होता. पोलिस आता तपासत आहेत की तो प्रत्यक्ष मतदानासाठी आला होता की नाही आणि त्याच्याकडे असलेली ओळखपत्रे व कागदपत्रे वैध आहेत की नाही.
मतदान केंद्राच्या परिसरात घटलेला हा प्रकार नागरिकांमध्ये चांगलाच गोंधळ निर्माण करीत असला तरी पोलिसांच्या वेळीच हस्तक्षेपामुळे मोठा अनर्थ टळला आहे. या घटनेमुळे जळगावात निवडणुकीच्या पारदर्शकतेवर नागरिकांच्या दृष्टीने चर्चा सुरू झाली आहे.
