प्रभू श्रीरामांच्या जीवनावर आधारित भजने व अभंगांची मेजवानी
साईमत जळगाव प्रतिनिधी
प्रभू श्रीरामचंद्र यांच्या जन्मोत्सवानिमित्त रामनवमीचे औचित्य साधून जळगाव शहरात ‘रामरंग : भक्तीचा आणि सुरांचा संगम’ या भव्य भजन संध्याचे आयोजन करण्यात आले आहे. गुरुवार, दि. २६ मार्च रोजी सायंकाळी ७ वाजता अयोध्यानगर येथील राममंदिर मित्र मंडळाच्या वतीने हा भक्तीमय स्वरसोहळा रंगणार आहे.
औद्योगिक वसाहत परिसरातील अयोध्यानगर येथे होणाऱ्या या कार्यक्रमात जळगावातील प्रसिद्ध ‘भक्तीनाद’ ग्रुपकडून भजन संध्याचे सादरीकरण केले जाणार असून, भक्ती आणि संगीताची सुंदर मेजवानी रसिकांना अनुभवायला मिळणार आहे.
या सोहळ्याचे प्रमुख आकर्षण म्हणजे सुप्रसिद्ध भजन गायक पं. नारायणभाई ओझा आणि प्रसिद्ध गायिका भानूप्रियाजी यांचे सुमधुर गायन. प्रभू श्रीरामांच्या जीवनावर आधारित भजने, अभंग आणि भक्तिगीते त्यांच्या आवाजातून सादर होणार असल्याने कार्यक्रमाची रंगत अधिकच वाढणार आहे.
कार्यक्रमाचे निवेदन कलावंत व लोकप्रिय निवेदक तुषार वाघुळदे हे आपल्या वैशिष्ट्यपूर्ण शैलीत सादर करणार असून, त्यामुळे संपूर्ण कार्यक्रमाला वेगळीच उठावदार छटा प्राप्त होणार आहे.
रामजन्मोत्सवाचा आनंद द्विगुणित करण्यासाठी आयोजित करण्यात आलेल्या या विशेष भजन संध्येत सहभागी होऊन प्रभू श्रीरामांच्या भक्तीत तल्लीन होण्याचे आवाहन आयोजकांनी सर्व रामभक्तांना केले आहे. मोठ्या संख्येने उपस्थित राहून या भक्तीमय सुरावटींचा आनंद घ्यावा, असेही आवाहन करण्यात आले आहे.
