सिंधुदुर्ग हादरला; जीवावर उदार होऊन बचावकार्य, परिसरात हळहळ
साईमत / सिंधुदुर्ग
करूळ घाट येथे सिमेंटने भरलेला ट्रक खोल दरीत कोसळून झालेल्या भीषण अपघातात बाप-लेकाचा जागीच मृत्यू झाल्याची हृदयद्रावक घटना घडली आहे. या दुर्घटनेमुळे संपूर्ण परिसरात शोककळा पसरली आहे.
मिळालेल्या माहितीनुसार, सिमेंट वाहतूक करणारा ट्रक घाटातून जात असताना चालकाचा ताबा सुटल्याने तो सुमारे ५०० फूट खोल दरीत कोसळला. या भीषण अपघातात विजापूर येथील बाप-लेकाचा जागीच मृत्यू झाला.
अपघाताची माहिती मिळताच पोलिसांनी तात्काळ घटनास्थळी धाव घेतली. दरम्यान, करूळ परिसरातील सह्याद्री जीवरक्षक टीमच्या मदतीने बचावकार्य हाती घेण्यात आले. अत्यंत कठीण भौगोलिक परिस्थितीत मोठ्या प्रयत्नांनंतर दोन्ही मृतदेह दरीतून बाहेर काढण्यात यश आले.
या बचावकार्यावेळी पोलीस निरीक्षक मनोज सोनवलकर यांच्यासह पोलीस कर्मचारी, सह्याद्री जीवरक्षक टीमचे अध्यक्ष हेमंत पाटील व त्यांच्या सहकाऱ्यांनी महत्त्वाची भूमिका बजावली. तसेच स्थानिक ग्रामस्थांनीही मदतीचा हात दिला.
या भीषण घटनेमुळे संपूर्ण परिसरात हळहळ व्यक्त केली जात असून, मृतांच्या कुटुंबीयांवर दु:खाचा डोंगर कोसळला आहे.
