साईमत / मुंबई / प्रतिनिधी
राज्यातील एलपीजी पुरवठा सुरळीत ठेवण्यासाठी शासनाने विविध उपाययोजना सुरू केल्या असून, शाळा, महाविद्यालये आणि रुग्णालयांना १०० टक्के गॅस पुरवठा सुनिश्चित करण्याचे निर्देश देण्यात आले आहेत, अशी माहिती अन्न, नागरी पुरवठा व ग्राहक संरक्षण मंत्री छगन भुजबळ यांनी विधानसभेत दिली.
राज्यातील रिफायनऱ्या पूर्ण क्षमतेने कार्यरत असून एलपीजी आणि पीएनजीचे उत्पादन सुरू आहे. एलपीजी उत्पादन ९,००० मेट्रिक टनांवरून ११,००० मेट्रिक टनांपर्यंत वाढवण्यात आले आहे. नागरिकांमध्ये घबराट पसरू नये यासाठी रेडिओ, एफएम, दूरदर्शन आणि मुद्रित माध्यमांद्वारे नियमित माहिती देण्याचे निर्देश देण्यात आले आहेत. तसेच, सोशल मीडियावरील अफवांवर नियंत्रण ठेवण्यासाठी जनजागृती मोहीम राबवली जात आहे.
काळाबाजार रोखण्यासाठी ८ मार्चपासूनच सर्व जिल्हाधिकाऱ्यांना दक्षता पथके स्थापन करण्याच्या सूचना देण्यात आल्या आहेत. राज्य स्तरावर नियंत्रण कक्ष सुरू करण्यात आला असून व्हॉट्सअॅप क्रमांक ९७६९९१९२२१ नागरिकांसाठी उपलब्ध करून देण्यात आला आहे.
दरम्यान, कंटेनर अडकल्यामुळे नाशवंत मालाबाबत चिंता व्यक्त करण्यात आली होती. याबाबत मुख्यमंत्र्यांशी चर्चा झाली असून कंटेनरवरील डॅमरेज शुल्क माफ करण्यासाठी प्रयत्न सुरू आहेत. केंद्र सरकारही या विषयावर सकारात्मक विचार करत असल्याचे सांगण्यात आले.
इंधन दरवाढीबाबत सध्या कोणतीही वाढ झालेली नसली तरी भविष्यातील स्थितीबाबत अनिश्चितता कायम आहे. सध्या २० टक्के इथेनॉल मिश्रण लागू असून, गॅस पुरवठ्यात अडचणी निर्माण झाल्यास कोळसा व रॉकेलसारख्या पर्यायी इंधनांचा वापर करण्याचा विचार केला जात आहे. केरोसिन पुरवठा साखळी मजबूत करण्यासाठीही प्रयत्न सुरू आहेत.
गहू आणि डाळींच्या दरात मोठी वाढ झालेली नसून काही ठिकाणी किरकोळ वाढ नोंदवली गेली आहे. आंतरराष्ट्रीय परिस्थितीमुळे काही जहाजे अडवली गेली होती; मात्र काही जहाजे आता मुंबई, कांडला आणि कोची बंदरांवर पोहोचली आहेत. भारत सरकारकडून रशिया, इराण आदी देशांकडून इंधन पुरवठा वाढवण्याचे प्रयत्न सुरू आहेत.
गेल्या काही दिवसांत गल्फ देशांतील तणावामुळे पुरवठ्यावर परिणाम झाला असला तरी परिस्थिती लवकरच सुधारेल, अशी अपेक्षा व्यक्त करण्यात आली आहे. जहाजांमधून इंधन उपलब्ध झाल्यानंतर संपूर्ण प्रक्रिया पूर्ण होण्यासाठी ८ ते १० दिवसांचा कालावधी लागू शकतो. तोपर्यंत घरगुती वापर, रुग्णालये आणि शैक्षणिक संस्थांना प्राधान्याने पुरवठा सुरू ठेवण्यात येत आहे.
