साईमत, जळगाव : प्रतिनिधी
शहरालगतच्या सावखेडा येथील जी. एच. रायसोनी पब्लिक स्कूलमध्ये देशाचे पहिले पंतप्रधान पंडित जवाहरलाल नेहरू यांच्या जयंतीनिमित्त बालदिन उत्साहात साजरा करण्यात आला. यावेळी गणपती नगर येथील “टोडलर टेल्स”मधील प्लेग्रुप व नर्सरीचे विद्यार्थीही जी. एच. रायसोनी पब्लिक स्कूलमध्ये साजरा होत असलेल्या बालदिनाच्या कार्यक्रमात उत्साहाने सहभागी झाले होते. विद्यार्थ्यांसाठी चित्रकला, बालगीत, वेशभूषा अशा स्पर्धा घेण्यात आल्या. सर्वप्रथम शिक्षकांद्वारे सर्व विद्यार्थ्यांचे स्वागत करण्यात आले.
यावेळी जी. एच. रायसोनी पब्लिक स्कूल व जी. एच. रायसोनी टोडलर टेल्सच्या मुख्याध्यापिका तेजल ओझा यांनी विद्यार्थ्यांना बालदिनाच्या शुभेच्छा दिल्या. तसेच विद्यार्थ्यांना आपल्या रोजच्या अभ्यासातून थोडी उसंत मिळावी म्हणून शिक्षकांनी विविध सामूहिक खेळांचे आयोजन केले होते. या दरम्यान, इयत्ता पाचवीसाठी बॉल थ्रो, सहावीसाठी दोरी उडी, इयत्ता सातवी व आठवीसाठी क्रिकेट आणि प्रश्नमंजुषा आदी खेळांचे आयोजन केले होते. प्रत्येक स्पर्धेतील सहभागी विद्यार्थ्यांना भेटवस्तू देऊन गौरविण्यात आले.
बालदिनाच्या कार्यक्रमात शिक्षकांनी नृत्य सादरीकरणाने उपस्थित विध्यार्थ्यांचे मनोरंजन करत त्यांचा उत्साह द्विगुणीत केला. कार्यक्रमाची रूपरेषा शिक्षिका अल्फिया लेहरी यांनी मांडले. यशस्वीतेसाठी सर्व शिक्षक, शिक्षकेतर कर्मचाऱ्यांनी परिश्रम घेतले. कार्यक्रमाचे यशस्वीरीत्या आयोजन केल्याबद्धल जी. एच. रायसोनी पब्लिक स्कूलच्या मुख्याध्यापिका तेजल ओझा यांनी कौतुक केले. सूत्रसंचालन शिक्षिका तस्लीम रंगरेज यांनी केले.
