साईमत, अमळनेर : प्रतिनिधी
ईकेवायसी केलेल्या ३ लाख शेतकऱ्यांकरीता मदतीचा २१० कोटी ३० लाख रुपयांचा निधी शेतकऱ्यांच्या बँक खात्यात थेट जमा करण्याकरीता त्यांनी संगणकीय प्रणालीवर कळ दाबून हा निधी शेतकऱ्यांच्या बँक खात्यात थेट जमा करण्याची प्रक्रिया मदत व पुनर्वसन मंत्री अनिल पाटील यांच्या हस्ते करण्यात आली. मागील पावसाळी हंगामात सततच्या पावसामुळे झालेल्या शेतीपिकांच्या नुकसानीकरिता शासनाने विशेष बाब म्हणून १५००.०० रुपये कोटी इतका निधी बाधित शेतकऱ्यांकरीता मंजूर केला आहे. मदत व पुनर्वसन विभागाने निश्चित केलेल्या डिबीटी प्रणालीमार्फत निधीचे वितरण सुरु आहे. मंत्रालयामध्ये मदत व पुनर्वसन मंत्री अनिल पाटील यांनी निधी वितरणाबाबत आढावा घेतला.
हा निधी शेतकऱ्यांच्या बँक खात्यात थेट जमा होईल. तसेच पुढील शुक्रवारपर्यंत आणखी २,५०,००० शेतकऱ्यांकरीता १७८.२५ रुपये कोटी इतका निधी त्यांच्या बँक खात्यात जमा केला जाणार असल्याची माहिती त्यांनी दिली. त्याचप्रमाणे शेतीपिकांच्या नुकसानीकरीता तातडीने मदत मिळावी, यासाठी आपले सरकार सेवा केंद्रामध्ये जाऊन ईकेवायसी करण्याचे मंत्री पाटील यांनी शेतकऱ्यांना आवाहन केले. ही सेवा निशुल्क असल्याची माहितीही त्यांनी दिली.
शासन शेतकऱ्यांसाठी सजग
डिबीटी प्रणालीत काही त्रुटी असल्यास त्या त्रुटीही तातडीने दूर करण्याच्या सूचना त्यांनी संबंधित अधिकाऱ्यांना दिल्या. शासन शेतकऱ्यांप्रती सजग आहे. शेतकऱ्यांकरीता कोणत्याही प्रकारे निधीची कमतरता भासू देणार नसल्याचे मंत्री पाटील यांनी स्पष्ट केले. तसेच शेतकऱ्यांकडून लवकरात लवकर ईकेवायसी करून घेण्याच्या सूचनाही सर्व तहसील आणि जिल्हा यंत्रणांना दिल्या आहेत.
