एमआयडीसी पोलिसात परप्रांतीय चार महिलांविरुध्द गुन्हा दाखल
साईमत/जळगाव/प्रतिनिधी :
शहरातील कृषी उत्पन्न बाजार समितीमधील भाजीपाला मार्केटमध्ये माजी नगरसेवकाचा महिला चोरट्यांनी ८० हजार रूपये किंमतीचा मोबाईल लांबविल्याची घटना शनिवारी घडली. याप्रकरणी एमआयडीसी पोलीस ठाण्यात परप्रांतीय चार महिलांविरोधात गुन्हा दाखल केला असल्याचे पोलिसांनी सांगितले.
सविस्तर असे की, जळगाव शहरातील माजी नगरसेवक राजेंद्र झिपरू पाटील हे आपल्या परिवारासह वास्तव्याला आहे. ते २४ मे रोजी सकाळी ९.३० वाजता शहरातील कृषी उत्पन्न बाजार समितीमधील भाजीपाला मार्केटमध्ये आले होते. त्यावेळी मार्केटमध्ये आलेल्या संशयित महिला लल्ली रमजान जोगी (वय २७), पूजा रज्जू जोगी (दोन्ही राहणार अमठी, उत्तर प्रदेश, ह.मु.ममता बेकरी, जळगाव) आणि त्यांच्यासोबत असलेल्या दोन अनोळखी महिला यांनी राजेंद्र पाटील यांचा ८० हजार रूपये किंमतीचा महागडा मोबाईल लांबविला आहे.
त्यानंतर राजेंद्र पाटील यांनी एमआयडीसी पोलीस ठाण्यात तक्रार दिल्यावरून चार महिलांविरुध्द गुन्हा दाखल केला आहे. तपास पो.हे.कॉ. रामकृष्ण पाटील करीत आहे.
