रिंगणगाव खून प्रकरणी जादूटोणाविरोधी कायद्याअंतर्गत कलम वाढविले
साईमत/जळगाव/प्रतिनिधी :
एरंडोल तालुक्यातील रिंगणगाव येथील १३ वर्षीय तेजस गजानन महाजन याचा गेल्या १६ जून रोजी मध्यरात्रीच्या सुमारास हत्या करण्यात आली. ही हत्या नसून नरबळीचा प्रकार असल्याचा संशय व्यक्त करत ग्रामस्थांनी तेजसच्या मारेकऱ्यांना शिक्षा व्हावी, या मागणीसाठी २७ जून रोजी जिल्हाधिकारी कार्यालयावर मोर्चा काढला होता. मोर्चानंतर खुनाच्या तपासासाठी जिल्हा पोलीस अधीक्षक डॉ. महेश्वर रेड्डी यांनी विशेष तपास पथक अर्थात एसआयटी स्थापन केले आहे. दरम्यान, या प्रकरणात आता ग्रामस्थांनी नरबळीची शक्यता वर्तवल्याने जादूटोणाविरोधी कायदे अंतर्गत कलम वाढविण्यात आले असल्याचे सांगण्यात आले. डॉ. रेड्डी यांच्या मार्गदर्शनाखाली या प्रकरणाचा छडा लावला जाणार आहे.
एरंडोल तालुक्यातील रिंगणगावचे गजानन नामदेव महाजन (वय ४५) यांचा मुलगा तेजस हा १६ जून रोजी बेपत्ता झाला होता. त्याचा मृतदेह काही दिवसात सापडला होता. त्याच्या गळ्यावर धारदार शस्त्राने वार केल्याचे आढळून आले होते. पोलिसांनी तत्काळ गुन्हा दाखल करून संशयितांना अटक केली होती. पुढे तपासात नरबळीच्या कलमांचा समावेशही केला आहे. मात्र, त्यानंतरही ग्रामस्थांनी तपासाबाबत असंतोष व्यक्त करत जिल्हाधिकारी कार्यालयावर मोर्चा काढला. यावेळी गुन्ह्याचा तपास स्थानिक गुन्हे शाखेकडे वर्ग करण्यात यावा. तपास करतांना नरबळीचे कलम समाविष्ट करून कार्यवाही करावी. शेतातील सीसीटीव्हीत दिसणाऱ्या एरंडोल संशयित आरोपी करावे. ॲड.उज्ज्वल निकम यांची सरकारी अभियोक्ता म्हणून नेमणूक करावी. प्रकरणाचा तपास फास्ट ट्रॅक कोर्टात चालवावा. त्यातील तीन मागण्या आधीच मान्य झाल्या आहेत. दोन मागण्या प्रलंबित आहे. यासाठी ग्रामस्थांनी पोलीस प्रशासन शासनाकडे पाठपुरावा करण्याचा निर्धार व्यक्त केला आहे.
विशेष पथकाकडून तपास अधिक गतीने अन् प्रभावीपणे करणार
पोलीस अधीक्षक डॉ. महेश्वर रेड्डी यांनी विशेष तपास पथकाची नेमणूक केली आहे. पथकात काही अधिकाऱ्यांचा समावेश केला आहे. पथकात अपर पोलीस अधीक्षक, चाळीसगाव (पर्यवेक्षण अधिकारी) कविता नेरकर, उपविभागीय पोलीस अधिकारी, अमळनेर, पोलीस उपनिरीक्षक विनायक कोते यांच्या मार्गदर्शनाखाली संदीप पाटील, जितेंद्र वल्टे, निलेश गायकवाड, राहुल कोळी, सचिन पाटील यांचा समावेश आहे. विशेष पथकाकडून तपास अधिक गतीने आणि प्रभावीपणे करण्यात येणार असल्याचे सांगण्यात आले.
