साईमत, चोपडा : प्रतिनिधी
गणपती बाप्पाचे आगमन म्हणजे उत्साहाला उधाण आणि तसेच बाप्पाला निरोपही तेवढ्याच जोशात दिला जातो. अशा जोशात रंगाचा भंग होऊ नये, म्हणून पोलीस, होमगार्ड, एसआरपी व इतर सर्वांचा खडा पहारा साऱ्या चोपडा शहरात असतो. स्वतःच्या गरजा, घरचा गणपती सारे बाजूला सारून ‘सद्रक्षणाय खलनिग्रहणाय’साठी कर्तव्य बजावणारे हेच सारे बांधव सामान्य जनतेसाठी खरे विघ्नहर्ता असतात. त्यांच्या कर्तव्याप्रती कृतज्ञता व्यक्त करण्यासाठी रोटरी क्लब ऑफ चोपडा आणि शारदा मॅथ्स परिवार यांच्या संयुक्त विद्यमाने तब्बल ५०० पॅकेट शिरा आणि पोहे यांचा स्वादिष्ट नाश्ता व सोबत पाण्याच्या बॉटलचे वितरण करण्यात आले.
शारदा मॅथ्स परिवाराच्या विद्यार्थ्यांनी सर्व पॅकिंग आणि वितरणाची जबाबदारी सांभाळली. त्यात विद्यार्थिनींचा सहभाग उत्स्फूर्त आणि लक्षणीय होता. चोपडा विभागाचे पोलीस उपअधीक्षक कृषिकेश रावले, चोपडा शहर पोलीस ठाण्याचे पोलीस निरीक्षक के. के. पाटील यांनी उपक्रमाचे कौतुक केले. उपक्रमासाठी चोपडा रोटरी क्लबच्या सर्व सदस्यांचे सहकार्य लाभले.
