साईमत, अमळनेर : प्रतिनिधी
येथील साई इंग्लिश अकॅडमी तसेच सामाजिक वनीकरण विभाग अमळनेर, वनक्षेत्र पारोळा यांच्या संयुक्त विद्यमाने बुधवारी, ५ जून रोजी जागतिक पर्यावरण दिन सोहळा साजरा करण्यात आला.सोहळ्यास अमळनेरचे सामाजिक वनीकरणाचे वनपरिक्षेत्र अधिकारी बळवंत पाटील यांच्या मार्गदर्शनाखाली वन विभागाच्या टीमची उपस्थिती लाभली. यावेळी वनपाल आय.टी.चव्हाण, वनपाल पी.जे.सोनवणे, वैशाली साळी, वनरक्षक सीमा शिंदे, सुप्रिया देवरे उपस्थित होते.
पर्यावरणाच्या अनेक समस्या सध्या जगभरात जाणवत आहेत. त्यासंदर्भात जनमानसात जागरूकता निर्माण व्हावी, यासाठी दरवर्षी जागतिक पर्यावरण दिन साजरा केला जातो. कोरोना काळात ऑक्सिजनचे महत्व आपल्याला समजले, वृक्ष हेच ऑक्सिजन-प्राणवायूचे प्रमुख स्त्रोत आहेत. म्हणूनच जास्तीत जास्त वृक्ष लावली पाहिजेत, ती जगवली पाहिजे, असे आय.टी. चव्हाण, सीमा शिंदे यांनी मनोगतात सांगितले.
याप्रसंगी साई इंग्लिश अकॅडमीच्या विद्यार्थ्यांना रोपे वाटण्यात आली. विद्यार्थ्यांनीही मनोगतात सांगितले की, आम्हाला मिळालेली रोपे आम्ही आजच आमच्या घराच्या बागेत, परिसरात, शेतात व इतरत्र लावू. रोपांची काळजी घेऊन, त्याचे संगोपन करून रोपांचा वाढदिवस साजरा करू. यावेळी अकॅडतीचे विद्यार्थी, पालक उपस्थित होते. प्रास्ताविक साई इंग्लिश अकॅडमीचे संचालक भैय्यासाहेब मगर, सूत्रसंचालन तथा आभार प्रियंका बारी हिने मानले.
