नवीन बस स्थानकाजवळील घटना ; जिल्हापेठ पोलीस स्टेशनला अकस्मातची नोंद
साईमत/जळगाव/प्रतिनिधी
शहरातील नवीन बस स्थानकाशेजारील एका हॉटेलमध्ये जळगाव शहरात कामानिमित्त पुणे जिल्ह्यातून आलेल्या वृद्ध व्यक्तीचा कुजलेल्या अवस्थेत मृतदेह सापडल्याचा प्रकार शुक्रवारी, २ मे रोजी सकाळी उघडकीस आला आहे. मोहम्मद शफी मोहम्मद मोमीन (वय ७०, रा. मंचर, ता. आंबेगाव जि. पुणे) असे मयत वृद्धाचे नाव आहे. दरम्यान, याप्रकरणी जिल्हापेठ पोलीस स्टेशनला अकस्मात मृत्यूची नोंद केल्याचे सांगण्यात आले.
सविस्तर असे की, मोहम्मद शफी मोहम्मद मोमीन हे आपल्या परिवारासह वास्तव्यास होते. ते रबरी शिक्के बनवून देण्याचे काम करून उदरनिर्वाह तर त्यांचा मुलगा वकिली काम करून उदरनिर्वाह करतो. दरम्यान, २८ एप्रिल रोजी जळगाव जिल्हा न्यायालयात रबरी शिक्के तयार करून ते जळगावात आले होते. रबरी शिक्के दिल्यानंतर तेव्हापासून ते बेपत्ता झाले होते. त्यानुसार याप्रकरणी जळगाव शहर पोलीस स्टेशनला बेपत्ता झाल्याची नोंद केली होती. त्यानुसार मोहम्मद शफी यांचा शोध सुरू होता.
रुग्णालयात मयताच्या मुलाचा आक्रोश
नवीन बसस्थानकाशेजारील असणाऱ्या एका हॉटेलमधील एका खोलीत मोहम्मद शफी यांचा कुजलेल्या अवस्थेत शुक्रवारी, २ मे रोजी सकाळी मृतदेह आढळून आला. त्यांचा मृतदेह शासकीय वैद्यकीय महाविद्यालय व रुग्णालयात दाखल केला असल्याचे सांगण्यात आले. ही माहिती मिळताच मयत मोहम्मद शफी यांच्या मुलाने रुग्णालयात आक्रोश केला. दरम्यान, मोहम्मद शफी मोहम्मद मोमीन यांच्या मृत्यूचे नेमके कारण काय? त्याची चौकशी करुन तपास सुरु असल्याचे पोलिसांकडून सांगण्यात आले.
