सिंहस्थ कुंभमेळ्यासाठी रेल्वे–जिल्हा प्रशासनाने केली सविस्तर तयारी
साईमत/जळगाव/प्रतिनिधी
जिल्हाधिकारी रोहन घुगे यांनी भुसावळ विभागीय रेल्वे व्यवस्थापक पुनीत अग्रवाल यांची प्रत्यक्ष भेट घेऊन रेल्वे प्रशासन आणि जिल्हा प्रशासन यांच्यातील परस्पर समन्वय अधिक बळकट करण्याच्या दृष्टीने सविस्तर चर्चा केली.
या बैठकीत आगामी नाशिक–त्र्यंबकेश्वर सिंहस्थ कुंभमेळ्याच्या अनुषंगाने आवश्यक पूर्वतयारी, प्रवासी सुविधा, वाहतूक नियोजन आणि सुरक्षा उपाययोजनांबाबत विचारविनिमय करण्यात आला. जिल्हाधिकारी घुगे यांनी प्रवाशांच्या सोयीसाठी आणि मेळ्याच्या सुरक्षेसाठी सर्व संबंधित विभागांनी एकत्रित प्रयत्न करण्याचे आवाहन केले.
याशिवाय जिल्ह्यात सुरू असलेल्या विविध रेल्वे प्रकल्पांसाठी भूसंपादन प्रक्रियेत येणाऱ्या अडचणी, सक्षम प्राधिकाऱ्यांना भेडसावणाऱ्या समस्यांचे निराकरण आणि भूसंपादनाची कार्यवाही अधिक गतीमान करण्याबाबतही सविस्तर चर्चा झाली.
जिल्हा प्रशासन आणि रेल्वे प्रशासनामधील सकारात्मक समन्वयाचे महत्त्व अधोरेखित करत, प्रकल्पांची वेळेत आणि सुस्थितीत अंमलबजावणी सुनिश्चित करण्यावर भर देण्यात आला. यावेळी स्पष्ट करण्यात आले की, जळगावच्या सार्वजनिक सुविधा आणि पायाभूत विकासाच्या कामांसाठी रेल्वे प्रशासनासोबत सातत्यपूर्ण समन्वय राखून कार्यरत राहिले जाईल.
