धानोरा ता. चोपडा ः वार्ताहर
येथुन जवळच असलेल्या देवगाव येथे मुख्य चौकात बंद घर पाहून चोरट्यांनी डल्ला मारल्याची घटना आज रात्री एक ते दोनच्या सुमारास घडली असून सकाळी ही घटना उघडकीस आली.त्यामुळे देवगावात खळबळ उडाली आहे.
देवगाव येथील रहिवासी असलेले प्रगतशील शेतकरी प्रकाश नथ्थु महाजन हे त्यांच्या कुटूंबासह राहतात. गावात त्यांचे दोन घरे आहेत त्यापैकी एक घरबंद असते. हेच बंद असलेले घराचे कुलुप चोरट्यांनी तोडुन घरात प्रवेश केला व घरात असलेले गोदरेज कपाटाचे कुलुप तोडले. महाजन कुटुंब हे सुरत येथे आपल्या नातेवाईकांकडे गेले होते. त्यांच्या पत्नी ह्या घरी एकट्या होत्या. आज सकाळी त्या दुस़ऱ्या घरात फ्रीजमधील दुध घेण्यासाठी गेल्या असता ही घटना उघडकीस आली. या चोरी झालेल्या घरातून सोन्याची साखळी 11 ग्रॅम, बाळ्या 6 ग्रॅम, ब्रेसलेट तसेच रोख रक्कम 1 लाख रुपये चोरीस गेले आहेत.अडावद पोलीस कर्मचाऱ्यांनी घटनास्थळी भेट देऊन पाहणी केली. डीवायएसपी हे देखील देवगाव घटनास्थळी भेट देत असून चोरट्यांचा मागोवा घेण्यासाठी श्वानपथकाला पाचारण करण्यात आले
आहे.
