दोघांना लोखंडी पाईपने मारहाण, एमआयडीसी पोलिसात चौघांवर गुन्हा दाखल
साईमत/जळगाव/प्रतिनिधी :
इंस्टाग्रामवर मुलीसोबत चॅटिंग केल्याचा जाब विचारण्याच्या कारणावरून एका तरुणासह त्याच्या मित्राला ४ जणांनी शिवीगाळ करत लोखंडी पाईपने बेदम मारहाण करून जीवेठार मारण्याची धमकी दिल्याची घटना शनिवारी, १७ मे रोजी मध्यरात्रीच्या सुमारास घडली. याप्रकरणी एमआयडीसी पोलीस ठाण्यात चौघांवर गुन्हा दाखल केल्याचे सांगण्यात आले.
सविस्तर असे की, अनमोल घनश्यामदास मंधवाणी (वय २८, रा.आदर्श नगर, जळगाव) हा १७ मे रोजी मध्यरात्रीच्या सुमारास त्याचा मित्र रोहित अशोक मंथान (रा. बाबा नगर, सिंधी कॉलनी) याच्यासोबत बाबानगर येथे शाळेसमोर आला होता. त्यावेळी इंस्टाग्रामवर मुलीसोबत चॅटिंग करण्याचा जाब विचारलच्या कारणावरून मयूर जावळे, विशाल बाबा, राज जावळे आणि भोला (पूर्ण नाव माहित नाही, सर्व रा. नवल कॉलनी, जळगाव) यांनी हातात लोखंडी पाईप घेऊन अनमोल मंधवाणी आणि रोहित मंथान अशा दोघांना बेदम मारहाण केली. तसेच त्यांच्या हाता-पायाला पाठीवर लोखंडी पाईपने मारहाण करून दुखापत करत दोघांना जीवेठार मारण्याची धमकी दिली.
दरम्यान, याप्रकरणी एमआयडीसी पोलीस ठाण्यात फिर्याद देण्यात आली. त्यानुसार चौघांवर गुन्हा दाखल केला आहे. तपास पो.हे.कॉ ईश्वर लोखंडे करीत आहे.
