साईमत, चोपडा : प्रतिनिधी
तालुक्यातील चहार्डी ग्रामपंचायतीला पूर्णवेळ ग्रामसेवकाची नेमणूक तसेच दिव्यांगांना त्यांच्या हक्काचा निधी मिळावा, यासाठी आपचे कार्यकर्ते व दिव्यांग बंधू यांचे तब्बल २० दिवसांपासून गावातील महादेव मंदिरात साखळी उपोषण सुरु होते. या कालावधीमध्ये मुख्य कार्यकारी अधिकारी यांना दोन वेळा निवेदन देण्यात आले. त्याची दखल घेत येत्या दोन दिवसात नवीन ग्रामसेवक रूजू करण्याचे लेखी आश्वासन त्यांनी दिल्याने साखळी उपोषण मागे घेण्यात आले.
चोपडा तालुक्यातील नंबर २ ची लोकसंख्या असलेली चहार्डी ग्रामपंचायत कार्यालयाचे कामकाज पूर्णवेळ होत नाही, ग्रामसेवक सतत गैरहजर असतात, ग्रामसेवकाचा मनमानी कारभार सुरु असून नागरिकांना कोणत्याही नागरी सुविधा मिळत नाही. ज्यामध्ये उतारे व दाखले वेळेवर न मिळणे, गावात स्वच्छता व साफसफाई न होणे, गटारी व सार्वजनिक शौचालयांची सफाई होत नाही. मैला उघड्यावर वाहून नदीत जातो. त्यामुळे पाणी दुषीत होवून नागरिकांच्या आरोग्य व गावातील पशुधन यांचे आरोग्याचा प्रश्न निर्माण होणे तसेच गावातील कुपनलिकेच्या पाण्याचा रिपोर्टपण दुषीत आला आहे. असे असुनही कोणतीही कार्यवाही न करणे व दुषीत पाण्याचा पुरवठा होणे आदी बाबींचा समावेश आहे.
दिव्यांग निधीपासून वंचित
दिव्यांग बंधु-भगिनींना दिव्यांग निधी मिळाला नसून त्यापासून ते वंचित आहेत. या सर्व सुविधांसाठी चहार्डी ग्रामपंचायतीला पूर्णवेळ व निवासी ग्रामसेवकाची नेमणूक व्हावी जेणेकरुन नागरिकांची कामे वेळेवर होतील. यासाठी आम आदमी पक्षाचे तालुका उपसंयोजक मुकुंदराव पाटील व गावातील दिव्यांग बंधू ९ ऑगस्ट क्रांतीदिनापासून साखळी उपोषणास बसले होते. २० व्या दिवशी लेखी आश्वासनानंतर साखळी उपोषण सोडण्यात आले.
यांची होती उपस्थिती
यावेळी प्रहारचे जिल्हाध्यक्ष बाळासाहेब पाटील, सुरेश पाटील (रावेर), रवींद्र पाटील (खडगाव), प्रहारचे तालुकाध्यक्ष भगवान वैदू, आम आदमी पक्षाचे जिल्हाध्यक्ष मिलिंद चौधरी, योगेश हिवरकर, योगेश भोई, जिल्हा उप संयोजक विठ्ठल साळुंखे, शिक्षक आघाडी जिल्हाध्यक्ष आर. डी. पाटील, तालुका संयोजक समाधान बाविस्कर, शहर संयोजक सुधीर पाटील, सिताराम पाटील, दीपक पाटील, प्रकाश सोनवणे, गोविंद कोळी, अनिल महाजन, ज्येष्ठ नागरिक भगवान वाणी यांच्यासह दिव्यांग बांधव उपस्थित होते.
